Kum 900 leng a hlun cangmi 'Westminster Hall' ah,

A Liannganmi Hmun, 'The Great Hall' ti zong an auhmi a si. UK Parliament, 'Palace of Westminster' ah a hlun biknak hmun a si cang. 1097 kum ah King William II nih a rak sakmi a si. Cu lio ah, Europe ah a ngan bikmi 'Hall' a si.

2018 ah a si. Kan miphun cheukhat hartongmi kong he pehtlai in ram kip kan tlawnnak in, London kan phan. Cozah upa, MPs pawl le cozah silomi Ramkomh Kawlram kong ah riantuantu phu le pumpak kan ton hna. UK Parliament umnak, ‘Palace of Westminster’ cu kan lutchuak lelek!

Cu lio ah, a kan tonpitu, Laimi a kan dawtu, kan ule hawitha Ben nih,

“Hika ah dir rih. Hman kan thlak lai tiah kan chuah pah ahkhin a ka ti.” 

Mifim theo, na theih cia a si ko lai,

“Hika hi Westminster Hall a si. Kum 900 leng a hlun cangmi Hall a si. Hika ah a biapi mi thil an rak tuahnak a si” tiah a ka chimh.

Cun, atu ahcun vawleicung cungcuang upa; "Biaknak lei le Cozah hruaitu tbk. nih UK an rak tlawn tik ah biachimnak hmun ah hman a si. Nain, mi tlawmte lawng nih biachimnak caantha an hmuh! Cu lo ahcun, a bik in anmah Siangpahrang biachimnak hmun a si. Cu biachimnak ah, House of Commons siseh, House of Lords siseh hmun khat ah thut in biachimnak ngaih a si.

1939 kum ah Albert Lebrun le 1960 kum Charles de Gaulle, France President nih a hmaisa biachimnak a rak ngaih. Cun, 1996 kum ah Nelson Mendala, 2010 Pope Benedict XVI, 2011 ah President Obama le 2012 ah Daw Aung San Suu Kyi lawng an si.

“Hika hmun ahhin, Aung San Suu Kyi cu a dir i biachimnak a rak ngei. Nain, cu lio ruahchannak kan ngaihmi cu nihin a dirhmun he cun a dang taktak cang. Biachimnak rak pek an timh lio zong ahhin, Parliament ah fakpi in caihhmainak le biaalnak (debate) a rak um cang. Cun, Parliament le cozah zung pawl kiakap i milem a dirmi na hmuh bang khin, Suu Kyi milem cu rak ser an timh ve. Nain, ruahnak a rak i dan ruang ah a rak dir lo. Rak dir sehlaw kan i ngaichih men hnga” tiah a ka timi pawl a ka chimh pah khin, a tanglei hmanthlak ka tarmi hi a ka thlak. 

A hlan lio ahcun, a biapimi Siangpahrang nih tuahmi rawldum tinak hmun, Siangpahrang luchinh chinhnak hmun (nawlpeknak hmun), a sunglawimi puai tuahnak hmun a rak si. A bik in kumzabu 5-15 kar 'Medieval Period' timi ahhin Siangpahrang pawl khuasaknak hmunhma bik a si tiah a ka chimh pah khin, leng ah kan chuak i, meeting dang kong kan caih. Kan lam kan i then beh….

2018 UK tlawnnak diary chung in...