Kum 2019 a dongh cu tha tein tuaktaan thannak (review) kaa tuah lai tiah ka lungthli in saduh ka rak that, nain a tlamtling lo.
2019 January 3 in Australia in Inn tlun ka thawh. Ka khualtlawn a peh ngai, ramchung le ramleng. 2019 Dec 15 ah ramleng tlawn hi ASEAN (cozah in) AICHR nih sawmnak in Indonesia kal in, Malaysia in a dih. Nain, ramchung tlawn cu Dec. 31 tiang a peh i, Kum thar 2020 January tiang ka phan. 2020 January 1 thengmang zong khuallam thluan cung ah ka um. Ka nuam ngai ko, nain kum khat chung zeidah a cang timi cu felfai tein kaa zoh than manh lo.
Khualrang ngai in ka hun tuak than ah, ka tuah bikmi hi, Kum khat chung ah ka khualtlawn a tam ngai mi hi a si, ka khualtlawnnak ah mi ton le tonbiaruahnak ah biachim deuh a si. Vawlei cung ah, ka upatmi le ka zohchun mi hna tampi he tonnak le biaruahnak ka ngei.
2019 chung ah philh awk tha lo dingmi lunglawmhnak lak Pathian thawng in hlawhtlinnak ka hmuhmi le miphun hawi nih dawtnak in upat minthatnak laksawng pekmi, CCN AWARD 2019 (April), SPY 2019 (August) le sau ngai ka rauhmi ka catial lim in Tang 16 (July) dih hna hi an si.
Keimah pumpak kong ah a si lo nain, ka lawmh bikmi cu UNHCR nih kan cheubaang a simi Chin miphun (Malaysia, Delhi, Nepal ummi) humhimnak kan pek than hna lai tiah biakhiahnak an tuah i thanh ni 2019 March 14 hi, ka nuamh bik Ni lak ah nikhat a si. Hmailei zong ah a si zungzal lai tiah ka zumh.
CCU ah cachimh 2017 thawk in ka thok i 2019 hi kum 3 a tling. Cun, Sianghleirun siangngakchia le Mino nih sawmnak in cawnpiak ah Pengtlang le Khua tam ngai ka phan kho. Khuanu/pa, Biaknak lei a kan hruaitu upa hna he pehtlainak a tha chin i, lunglawmte in a kan dirp kum zong a si. Cun, party ramkhel ah kan dirpi ve ko cang tiah an ka sawm kum zong a si [zeitin2 tiah halchap lo ding .]
Bawipa thatnak hun rel ding tampi a um len rih. Mahbel, nihin khuasik khuaruah in ka ruah khawhmi vial a si. Lam a ka hruaitu, ruahnak a ka pe in dirkamhtu, tlangtlatu, thazaang petu vialte le hawile nan cung ah ka lawm.
Tu kum caah, zei dang ngai kaa ruah khawhmi a um lo, nain kan hnu kum (2019) keimahnak in a tha deuhmi ka si khawh dingmi hi 2020 chung ah ka zuam dingmi cu a si.
A donghnak le hmanthlak tarmi fianternak:
Kum khat chung, pumpak kong ah silo in, rian kan tuannak le cawlcanghnak ah langhter awk tha ve lomi, chim awk a tha ve lomi, hmanthlak in hmuhsak awk a tha ve lomi tete a tam ngai. Cu hna lak ah, atu ka hun tarmi pakhat hi a si, kei uar ngai ruang ah ka tar sawhmi a si. Ka tialmi he pehtlaihnak zeihmanh a ngei lo. UN nih Ramkomh Kawlram kong Hlathlaitu Phu (mirangca in an min tial awk a tha lo) a ser i, cu nih UN Zungpi ah kum khat chung an kherhlaimi chung in an hmuhchuahmi chimrelnak an ngeih lio ah, Lunglawmhnak le ka hmuh ning tawite biachimnak ka ngeih lio a si.
Ka lawm,
2020 January 12
