Zaanlei sang ah Kapi inn in ka tin hnu ah, hawi sin ah lentecelh pah ah ka leng. Kan ngol in, thei duhmi herhhai kong ah kan bia vun sau deuh hnu ah, kan i then cio hna. Kei a hnu bik ah ka tang. Motorcycle in ka hun i thawh hnik ah, phone ra kaw ka tlaih lai ka ti kar ah hawi nih an ka kal tak.
Ka vun i thawh than lai ka ti ah, ka hnu in Motorcycle mei ceu nih a hun ka phanh i, horn a hun ka tumh. Zeidah si hnga tiah ka dir piak i Kawlholh in a hun ka chonh. "Ka u, lam ka tlau" a hun ka ti.
Ka zoh i, ruahsur lak ah sau nawn rat cang dawh a si. A cin dih, a duk dih cang. Ka motorcycle mei ka hun mer i, fiang deuh ka hun zoh ahcun, a 'zaa' pah ngai mui fawn!
Khawika in na rat? Khawika kal na duh i dah na tlau? Zeidah kan bawmh khawh lai ka ti cu "Lailenpi in ka ra. Sianginn ah kal ka duh, hika hrawng ahhin sianginn a um an ti a ka ti. Ka chungkhat an um a ka ti." Zei sianginn, Tangli tang? Tangriat tang, Tanghra tang? Zei sianginn ka ti cu a hngal ve lo, Sianginn ti lawnglawng cu a hngalh.
A si ahcun, na kal duhnak inn an phone na ngei maw? Kan chonh lai i, kan thlah lai ka ti. Kan chonh i, nan umnak in khan nan a hla lo. Vun ra ulaw chuk ah rak zuang u a kan ti.
Phone cu ka chiah i, hmai ka sak piak i kan kal. Chukzau nawnte lampial pakhat kan kal hnu ah, kan kal duhnak sianginn cu ka chim, kan rak i palh diam. A ping ah kan kal. Innsi a rak thuhmi nupa kha lam ka hal than hna. An kan chim i, a kir in kir than haumi dirhmun kan si. An kan chimh ning in kan kal i, pialnak pahnih an kan chimh.
Pakhatnak kan phanh ah ka hal cu, hika zong ngah, hika lonh zong ngah an kan ti i, a hmaisa in kan pial. Chuk sau taktak, mui lak ah, furcet lak ah kal cu a har tak. Sau nawn kan tum hnu ah, si dawh a si than lo caah, ka dir. Mei ceu a vangmi innka ka kingh i, nan um maw ka ti i, ngakchia pahnih an rak chuak. Sianginn min cu ka chim i, hika lei in cun kal ngah lo. An zul tuk lo, lam tha lai lo. Cho chuak lai va kai than u law, kehlei kam ah va kal u law, lam pial pakhatnak in va pial u an kan ti. Cho cu chuak lai kan kai than. Cho chuah i a inn khatnak cu ka kingh than i, felfai tein ka hal hnu ah, chuk zuan than ding a si nak tiang ka hei thlah. A palh ti lai lo tinak tiang ka hei kalpi.
Mui le zaan si ruang zong ah a si pah nain, voithum khengte ka tlau. Ka thlah dih hnu in ka tin. Kan inn ka phanh hlan a tan tim tluk a duh ah, ka motorcycle datsi a dih. Kapa cycle ka cit caah, Datsi a fel theo lai tiah ka chek lo. A chung ah thawl in a chiah tawnmi ka zoh cu a didawr te lawng a um. Zei ngah ding silo. Ka rawn i, ka chem, ka din, ka chem i, inn phanh deng tiang ka kal kho.
Motorcycle datsi rawnnak ka chem pah voihnih thum ka dir le a kal khawh tilo hnu ah, ka nam. Lamphei a si cang i, nam cu a fawi ko.
Minung kan ruahnak ah, thatnak tuah (Lamtlau mi lam ka hei chim) ahcun, thatnak le tluannak tete ruahchan a si theo. Nain, cutin a rak si dih lo. Kan ruahning thengtheng in thil hi a kal tawn lem lo. Kan tuah ning zong in thil hi a phi a chuak lem tawn lo. Lamtlau pa kha, a zaa (ri) pah mi si ko, Kawlholh in pei a ka chonh cu tiphun in ka kaa in kaakhat hnih luklak chim in, tin tak ning law kan inn cu lonh lak tiang zong ka mongh khawh hnga.
Nain, lam tlau ruang le a si lonak ah kal ruang ah chok tektereng cho hnih ka kai i, Datsi nih lam tim in a ka dih tak. Thil thar ka tonmi le thil sining nih ka lung a ka lawmhter. Hakha ah ka tlau timi le lam a tlau ve mi a dang a phanh duhnak ruahsur lak ah ka hei bawmh timi ka lung a ka lawhter.
Ka motorcycle a kal khawh tilo hnu zong ah, cucu ruah pah bu cun lawm ngai in ka nam thluahmah ko. Kan tuahmi cung ah kan i lawm hi a biapi ko rua timi ka ruah lio ah, phone call a dang a hung lut i, duh sah in inn ka phanh tiang kan i chawn....
No comments:
Post a Comment