Naihrawng Ka Lungtaapmi "Nawlngeihnak"

"Siangcachim hna sin Nawlnak Biacah (An Appeal to Teachers)" timi tlangtar in Nazi Camp mithahnak in a luatmi Sianguk nih a tial an timi ca hi a si. 

"Keimah hi Nazi nih mithahnak ah an hmanmi 'concentration camp' in a luatmi ka si. A hohmanh nih an hmuh lomi ka mit in ka hmuh. Mithahnak 'Sivai Inn (Gas Chambers)' kha Engineer thiamnak a ngeimi nih an sak. Ngakchia kha Sii lei thiamnak a ngeimi nih Sii-ai in an thah hna. Ngakchia bawhte kha sizung nurse nih an thah hna. Nu le ngakchia tampi kha siangsangrun (high school) le sianghleirun (university) fimnak a cawng in a dihmi hna nih an kah hna i, an thah hna. Cucaah, fimcawnnak timi nih ka lung a ka hrinh. Kan nawl duhmi hna cu, "Na siangnakchia hi minung lungput (mizawnruahnak) ngei ding in cawnpiak hna." Na zuamnak le na thazaang chuahmi hi tihnungmi mifimthiam zorter le ziaza thalo tlawmter hi a si awk a si. Fimthiamnak kan timi carel, catial thiam tbk. le tuanbia theihhngalh le kanan thiam tbk. nih mizapi caah thatnak a chuahpi le fimcawngmi ngakchia nih minung lungthin (mi zawnruahnak) an ngeih hi a biapi bikmi a si awk a si." 

Cucaah, uknak le pennak thalo tang ah um ahcun, ruahnak a dan ruang le miphun a dan ruang ah harsatnak a phunphun ton a si. Minung pakhat cio i upatnak a um lo ahcun, minung kan sinak limhang zeihmanh a um lo. Cucu kanmah kan sining he zong vun tuaktaan awk ah a herh ngaimi ah ka ruah!

Nunnak timi hi ahohmanh nih kan i pek khawhmi le ser piak khawhmi a si lo. 

Mi tam-u simi nih mi tlawm-u namneh, nawlngeihnak hmang in miphun dang, nunphung dang, caholh dang a hmangmi hna namneh hi a um kho pengmi a si. Cucu, uknak phung ruang ah a si theo. Kanmah kan i tel ve lonak ah kan kong an caih tik ah ningcang lo pi in thil a um kho tawn mi a si.

A cunglei langhter mi a cannak a ruang hi uktu Hitler ruang ah a si. A ngaingai tiah ahcun, Hitler hi Democracy zauk phung ning tein 1932 July thla ah an rak thim i teinak a hmumi a si ko dahkaw! 

Cucaah, US president 3nak Thomas Jefferson nih a timi cu, "Mizapi nih a cozah an tih tik ah, a chiakhami le namnehnak phung a chuak i, a cozah nih mizapi a tih tik ah Zalonnak a um" a rak timi hi nihin kan dirhmun ah ruah a herh tuk hringhran ka ti. 

Zauk phung ah, cozah cu mizapi nih kan thimmi a si i, cozah nih a tuah le tuanmi cu mizapi kan caah thatnak a chuah ding kha an rian a si. Mizapi caah a si lo ahcun, kan ruah than ngaingai a hau.#