“Demonstration (သပိတ်မှောက်/Sandahpiah)” ahhin, Democracy he a kalh taktak mi thil a um tiah an ti.~
Cucu, minung pakhat-hnih hrawng lawng nih biachimnak Loud Speaker/Microphone tlaih in bia an chim. An duh ning in an kalpi. Minung pakhat-pahnih nih an control, an uk.
Cu minung cu zapi lungtlinnak in thimmi an si maw silo timi cu kan hngalh dihmi a si. Zeipoah hi ruah deuh awk lawngte an si ko —
Cutik ah, an hruaimi hna cawlcanghnak kha tlangtlak khawh lo khi a um theo tawn.
Kan hnu, May 25 ah Minneapolis Palek pa nih, a kutkhih cia mi George Floyd cu minute 8 tluk chung a khup in a hnawng cu a rialdip i thawh chuah khawhlo in a um Ruang ah a thi.
Mirang pa nih Minak pa nunnak a lak. Palek pa nih, zaran minung nunnak a lak. Humhimnak pek lo in, nunnak tu a lak tiah sining then thleidannak in buaibainak a hun chuak.
Cu nih cun, COVID-19 lak ah a si ko nain, US khuapi cheukhat cu mibu nih duhlonak langhter in khuaci a muiter. Asinain, hmun cheukhat i, duhlonak an langhter ning cu duhnung lo ngai ah a hun i chuah. Duhlonak langhter mi le palek karlak ah ral bang i entainak a chuah lawng silo in, dawr khangh le fir tiang a hung um phah.
Hiti Palek le Duhlonak langhter mi hna karlak ah entainak a chuah ruang ah, May thla zarh dongh ah, Palek pahnih, a kum 29 le 24 an thi tiah Pastor pa pakhat nih a tial. Nain, Thawngpang tialnak News pawl ahcun, hmuh cu a si lo. An chungkhar, nupi le fa an kaltak hna.
Cun, cu lak ah, Social media cung ah a hung lar ngaimi pakhat cu, Indonesia in US ah a pemmi pa nih Dawr pakhat a cheh, a hrawh lio hmanthlak tarmi a si. A kut ah, Indonesia tikulh pakhat i, hmanthlak kha a baan ah Tattoo mi nih nihchuah leimi a sinak cu a langhter tik ah, mi cheu nih duhlonak langhter mi hi man phalh zong an si kho men timi lunghrinhnak tiang a chuak. Hihi, duhlonak langhter man phalh hi kanmah Kawlram zong ah a tam ngai mi a si ve. Nain, amah pa nih cun, fianternak cu a tuah ve.
Nunnak a liam ciocio a si ko nain, nawlngeitu nih nawlngeihnak hmang in an tuah sualmi cung ahcun, fakdeuh in hmalaknak a ummi cu a um tawnmi a si ko. Nain, Nunak cu a hlei in ahohmanh nih ngaihmi a silo caah, nunak poahpaoh cu a sunglawi tukmi a si.
Cu lio ah, Duhlonak a langhter mi pawl sin ah, mithi pa George Floyd a naupa Terrence Floyd nih, "Ngol cang u law, nan aukhuanmi le duhlonak nan langhter mi nih ka upa hi a nung in a kir ter than hlei ti lai lo e" tiah a ti.
A khup a bil i, duhlonak langhter mi zapi mibu sin ah, kan nawl hna, ka upa kong ah "justice" halnak hi remdainak he tuahmi duhnak langhter si seh. Kan kehlei ah Remdaihnak (Peace) le kan orhlei ah dingthluk lairelnak (justice) siseh, hi pahnih hi an kalti a hau mi a si tiah a nawl hna.
Kan rauhnak a dang liangluang ko men lai. Palek pa nih, a kutkhih cia cang ko mi, ka thaw ka chuah kho lo a ti bu in a thlahlomi kong zapi kan hmuhnak ah a palh ti leng chim ding a um tuk hnga lo. Nain, minung nunak kha minung nunnak dihnak lila a hman ahcun, thil tha cu a si hnga lo.
Atu ah, minung pakhat ruang ah a dang minung pahnih nunnak a dih chap, a sunglawi tukmi nunnak a hlei in a liam. Duhlonak langhter ruang ah sungh le zatlaknak a dangdang tampi a chuak fawn.
A dikfel lomi (injutice) le tlukruannak a um lonak (inequality) hi amah a dikfel lomi (injustice) lila in a nam ah cun zei ngaingai hmai a fong lai lo dah! #
Ka hmuhning ka hun thai sawh ve!
