Bangkok: Ralkap cozah uknak nih Zertian, Thintawi le Ziachiat tbk. dahlo a dang zeihmanh a thami chuahpi rua lo

Bangkok Khualipi; Salai SH Lian (Photo)

Ruahlopi in ka mobile ah 'ting2' timi thawngpang a hung thang! Zaan ah si, ka hawipa nih a ka riak i kan thu ko rih. Signal silo ah Whatapp ah na rak online kho ta lai maw? Biaruah kan in duh, chikhat telawng a si lai.... Bangkok, Malaysia silo ah, Bangladesh ah pakhat chingchang si khawh ahcun ti a si. Cutincun, Hakha chuahtak ka timh hlan zarhkhat aa duh ah tlawnkai ding lam a hung um.

Thla khat fai cachimh in khualtlawn ka dinh hnu ah ramleng tlawn ding a si. Kan hnu kum, April in tlawn ka thawk i, December 24 tiang, kum thar January ah ka khualtlawnnak in ka kir. Voi dang ahcun, Bangkok kal hi ka ngaih theo tawn. Tutan bel hi voidang bang a si lo. A ruang tampi lak ah, ka kal hnawhmi le timhmi ruang zong ah a si kho ko men. Cun, Pu Biak nih a kan liamtak hnu hin Bangkok kal hi a nuam tilo tuk in ka thei. Vanlawng dinhnak ah sumilam tlawmpal ngaih ahcun, tlanglawng in kan va tlik theo nak cu si kaw, a fawi ve lo! Bangkok a rak lum ngai, nain atu cu a si tilo.

Tutan cu a dang khun! Bangkok a nuamh lo lawng silo in, a mipi pawl cawlcangh ning a thleng ngaingai. Caan sau nawn hnu ah, a si ruang zong ah ka theih lo bia si kho. Cu lak ah ka lung a tangmi tete chung in;

Taxi motor mawngtu tiang an zia a thleng, a rawk;

Khuachung Tlanglawng; Alian (Photo)

A luan ciami kum 4/5 ahcun, Taxi motor kham in a chung ah luh in thut colh ah Meter sehte an on i cucun kan phanhnak tiang ah a dihmi poah kha liam a si ko. Atu ahcun, zeizahdah na kan pek lai, Meter cun ka kal duh lo timi tete a tam ngai cang. A man khiah i, a tam deuh lak khawh le hmuh khawh an i timhmi a lang ngai. Cun, zeitindah kan hlen khawh hna lai timi mit an au cang. An zer deuh ngai in ka thei.

Cu ve bantuk in, Motorcycle taxi pawl zong an si thiam. Anmah an umnak hmun (zone) an thenmi ah man khiah cia dihmi a ret an ngei. Nain, mah cucu an zul duh lo. A hlei hmuh duhnak lungput he an khat cang. Mi hlen duhnak lungput he an um cang. An dihlak cu an si hrimhrim lai lo nain, zarhkhat tluk ka um chung ah ka ton ngai. Grab tbk. in a man zohfel ta lo ahcun, taxi cit ngam lo ding phun in a um cang. Baht 50 in kal khawhnak bak, Baht 100 an ka hal hi a um len. Aa...! a silomi tiah ka vun al hna hnu ah, fang 10 tbk. khin an thum thluahmah. Cucu, an zia a thlengmi lak ah hmuh khawhmi pakhat a si.

Bus mawngtu zong zei an hlei lo;

A hlan ah Bus hi ka rak i cit tuk lo hlah maw ti awk tiang khin khua a hun ka ruahter. An bus mawngh ning cu Yangon ah a hlan deuh lio kan i citmi he khan a dang tilo. Tuan ahhin, Horn tum thawng hi theih awk a tlawm ngai. Bus cu daite le nuam tein cit si theo, tutan cu lungnuamlo ding phun tiang khin a um. Ka citnak a sang/veng lei zong nih a ngeihmi a si kho men. Nain, cucu thil tha a si lo. Thailand ahcun, an dai, an i panh tbk. in ruah a si tawn.  

An i panhlo deuhmi a lo;

Zaan ah Motor a chawkmi; Alian

‘Land of Smile’, panhhlau tein umnak vawlei an ti tawn bang a si tilo. Tuan ah tahchunnak ka chim theo mi, Thailand kal le Malaysia kal cu a dang tuk. Thailand ahcun, mi an i panh, an thinsau, an aw nem. Nain, Malaysia cu an thintawi, an ka hrang, an zia tha lo. Lungthin ah hna ngam lo ka ti tawn. Atu cu, Thailand zong an i panh deuh tilo, an aw nem deuh tilo!

Cun, a hleikhun in Dawrhngaktu, Cazi tbk. a bik in 7/11 dawr tbk. a hngakmi zong an mi chonhbiak ning a dang ngaingai. Chawhlehnak rian hmanh ah hitin an um cu a thleng ngai tinak a si ko hei ti. A dang pakhat cu; a cozah rian ah a bik in khualtlawngmi nih kan hmuh khawhmi hna lak ah, Airport riantuantu, Immigration riantuantu tbk. pawl zong an michonh biak ning a dang ngai. An aw hran a fawi!

Hihi vialte hi, Ralkap cozah nih 2014 May thla thawk in Nawlngeinak an lak i, kum khat hnu, kum khat in an chawlehnak a tlak ruang le an tumchuknak nih a chuahpi mi a si ko rua ka ti.  Dusah in thilman a kai lengmang. Atu ah, tamlak te a kai cang. An hmuhmi le an hmannak a tawk thluahmah ve tilo. Ralkap cozah si hnu ah an ram a remhtu le nuamhtertu tiah ruahmi Siangpahrang a hun thi ve. Atu ah, mizapi nih an duh lem lo mi Siangpahrang thar an ngei. Siangpahrang hlun a fapa asinain, a tlanval lio ah a sual ngai. An upat lomi a si. An uar lo ngaimi a si tik ahhin, nawl zong an ngai deuh ti rua lo ti awk phun in a um.

Photo; Salai SH Lian 

An uknak le hruainak nih chuahpimi tumchuknak le tlaknak ruang ah a fawinak in tangka kawl, hlen awk thami hlen, hran hnawh awk tlak tiah ruahmi hran hnawh. Kan nih Kawlram mi cu an kan nek cia chinchap ah, Kawlram mi kan si tiah chim ngam ding ah a har chin. Atu ah, Thailand cu Laimi nih ngandamnak thlopbul ruah ah kan panh ngaingai. Cucaah, kan i ralrin a hau ko ruah tiah tutan ka thiltonmi tlawmte ka hun tial hi a si.

Cucu nih khua a hei ruahtermi cu, kum 4 fai tluk Ralkap nih an uk ruang ah an i thleng tiah ka ruah cu si kaw, kan nih kum 70 leng uk cangmi le pen cangmi kan ziaza, kan nunning, kan thinlungput a rawhmi hi cu kan mawhlo tiah ruah ding phun khin a um. Nain, a rawhning in umpeng awk cu a tha hnga lo! Cucaah, cozah le uknak thalo hi cu mizapi sifahnak, harsatnak a phanhpi lawng silo in, thintawi, ziachiat, le zertian tiang a phanhpi ko rua timi hi kum 4 chung keimah pumpak nih Bangkok ka tonmi chung in ka ruahning ka hun tial.....

Biakilh: Catial lonak sau tiah khualtlawn pah in hmuhmi chung in tialmi a si.

Salai SH Lian
Feb., 2019