South Korea President Phuahnak Le Puanzarphen Thil Sining

Published in Chinland Post (Online)

South Korea tuanbia ah a umbal rihlomi zauk phung ningte in thimmi President a rian in dinhter cu tutan President Park Geun-hye nih a ton taktak cang. South Korea ah a voikhatnak President phuahmi a si. Phundang in chim ahcun President Park Geun-hye hi zauk phung ning tein thimmi hnu ah a voikhatnak a rian in dinhtermi a si.

President nu hi Pi Choi he an i hawi komhnak le pehtlaihnak ruang ah President a sinak in an thlak lawng silo in, thong tiang hmanh tla kho ding dirhmun a phakter.

Parliament nih President nawlngeihnak zeihmanh i donhkhanhter loin a hlathlai i ziknawh le eihmuarnak ah a tel ko tiah biachahnak an tuahmi cu Biaceihnak Zungpi nih fehternak an tuah cang. Hihi amah President nu pumpak hawikom tha Choi Soon-sil he pehtlaihnak in a thawkmi a si.


Atu ah President sinak dirhmun a sungh cang caah mipi pakhat sawhsawh bantuk dirhmun lawng a si cang. Cucaah, thilsual, ziknawh le eihmurnak a tuahmi kong ah sualphawt khawh a si cang.

Cun, atu bantukin biaceihnak zung nih a sang bik biakhiahnak an tuah cang caah a rannak bik in ni 60 chung ah thimnak an tuah colh a hau dingmi a si.

Zeiruang dah Park Geun-hye nih a rian a sungh?

Atu bantuk thil a canmi vialte hi President Park le a hawinu Pi Choi Sonn-sil pehtlaihnak kar ah a hngatmi a si. Pi Choi nih hin, President nu he an i pehtlaihnak a that ruang ah cucu phungninglo in a hman. Cucu phungning lo in a hmanmi cu South Korea ram ah a ummi Company cheukhat kha Pressure a pek hna. Hi thil a cannak cu Pi Choi nih President Pi Park he an i pehtlaihnak hmang in Company kha amah [Pi Choi] nih a tawlrelmi riantuannak bu ah tangka tampi a hlutter hna timi in a thawkmi a si.

Cu lawng siloin, riantuan a tlamtlin khawhnak ding caah President Pi Park hi amah pumpak lila a tel i, Pi Choi sin ahhin a cozah minung a si lomi nih tonghtham khawh lomi le hmuh ding a si lomi catlap le herhhai tiang a phan.

Cu bantuk thawngpang a chuah cangka in kan hnu  December 2016 ah South Korea Parliament nih President Park cu a rian phuah ding ah an ceih colh. Cun, a sang bikmi biaceihnak zung Constitutional Court nih a tawlrel i; a rian phuah ding maw a si lai, asilo ah Parliament nih an chuahpi mi deuh dah let than ah a tha lai timi caansaupi chung an ceih.

Cucu nihin cawn ninga (March 10) ah Biaceih Bawi minung 8 a telmi nih biakhiahnak an tuah hi a si. A biakhiahnak ah an hngattermi cu President Park a thil tuahmi nih zauk (democracy) phung le phungphai upatnak (rule of law) a muru le thlarau simi vialte a hnursuan dih.

Biaceihnak Zung nih cun, "President nu nih hramhram in phung a buar. Cucu, Pi Choi nih a hmuh awk le tongtham ding a silomi cozah kongkau ah a thlakter. Cucaah, cozah nih zulh ding timi phungphai a buar lawng silo in, rampi nih thlithup (secret) tampi zong leng ah a chuahter" tiah an ti.

Nain, President nu nihcun, "Pi Choi nih a cozah he pehtlaihmi catlap le herhhai pawl kong ah a thlaknak a um lo. Hihi cu sualpuh le thatlonak kawl sawhsawh bia lawng a si tiah a al lengmang lawng silo in, cu bantukin lunghrinh dingmi kong a chuahpitu lila zong cu sualphawt in a mawhchiat ve hna".

Tulio ah zeidah a cang?

Pi Park Geun-hye cu President a sinak in phuah a si cang. President nih tuah dingmi le tuanvo vialte tuahnak nawl a ngei ti lo. Cucaah, amah aiawh ah Prime Minister nih a rian cu a tuan chung cang.

Cun, Pi Park nih a zung cu a chuaktak hrimhrim a hau cang. A zung lawng silo in, phungningte in a umnak President Inn zong in a chuah a hau. Cuhnu ah, ni 60 chung ah South Korea President thimnak cu an tuah than colh lai.

Zeitindah an lehrulh cio ning a si?

President Pi Park ziknawh le eihmuarnak ah a tel timi thawngpang a than cangka in South Korea ram chung ah duhlonak langhternak in a khat colh. President Pi Park cu a rian in tum seh timi halnak catar le duhlonak langhter cu kan hnu kum in a peh zungzal ti awk khin a um.

Asinain, a donghnak South Korea biaceihnak zungpi nih biakhiahnak an tuahmi cung ah mi tampi an i lawmh lio ah, a cheukhat cu an thinhung. An aipuang i, an ngeih a chia. Cuti a thinhung le aipuangmi cu Pi Park a dirkamhtu le tanhtu an si. President Park a dirkamhtu hi upa deuh le chanhlun kaldaan (older conservatives) a uar deuhmi pawl an si.

Biahkhiahnak an tuahmi duhlonak a langhtertu, Pi Park a tanhtu chung in biaceihnak zung hmai ah minung pahnih zong an thi.

South Korea caah zei suallam dah a ngeih?

President Park rian phuah ding ah duhlonak langhtermi

President Pi Park a rian an ngolter hnu in a cang khomi cu sualphawt in tazacuainak tuah a si. Culawng silo in, President Pi Park i a hawinu Pi Choi hi a bia an ceih liopi a si ve. Pi Choi hi ziknawh le eihmuarnak (bribery & corruption) he pehtlaih in a kong an ceih liopi a si.

Cu lawng silo in, atu ah ziknawh le eihmuarnak ah tangka tampi a rak pek hna timi ruang ah atulio Samsung Company hruaitu lubik (de-facto) khan a simi, Lee Jae-yong zong biaceihnak an tuah cuahmah lio a si. Cucu, President nu, Pi Choi kong he pehtlai in a si thiam fawn.

Hi thil a can ruang ah duhlo langhternak nih thil tampi a thlenmi a um tiah South Korea kong hlathlaitu le thiamhleisang nih an ti. Ramkhel riantuantu cheukhat le South Korea ram ah chawlehnak nganpipi riantuantu hna pehtlaihnak a thatter chin tiah an ti. South Korea ram ah chawlehnak nganmi pawl cu chungkhar hrambunh deuh in tuahmi an si fawn.

President nu an phuah hnu in South Korea rampi uktu President thimnak an tuahmi nih thil tampi thlennak a chuahpi khawh men. Nain, South Korea mipi karlak ah fakpi in thennak a um.

South Korea chawlehnak zeitluk dah a hnursuan?

Atulio a cang cuahmahmi nih South Korea business world (chawlehnak vawlei) vialte a hnursuan dih. Cu ruang ah, atulio Samsung Company lubik tlaitu Pu Lee Jae-yong zong thongthlak a tong. Atu ah a konglam an ceih cuahmah lio pi a si.

Pu Lee Jae-young thong tlaknak a ruang cu Samsung Company lawnglawng nih President sin ah mithmaitha hmuhnak ding caah Pi Choi nih a ngeihmi mibawmh chanhnak Foundation pakhat ah Korea tangka in 41 billion (US $36 million) tluk a pek caah a si.

A hram thawk ahcun, Samsung nih kan pek lo tiah an al nain, a hnu ahcun kan pek ko tiah an cohlan than. Nain, Pi Choi sin ahhin, USD $1 million lawng kan pek tiah an chim. Hi bantuk thil a can ruang ah, South Korea ram ah riantuantu le rianngeitu Company tampi cu an kir than. Samsung he riantuan timi tampi zong an tangka phummi tampi an lak than.

Samsung hi 2016 ah vawlei cung Smartphone zuar kho bik min thatnak zong a hmumi a si.

Atulio an hrenmi Samsung Company lutlai hi Samsung Group Chairman Pu Lee Kun-hee fapa kum 48 lawng a si rihmi Pu Lee Jae-yong a si. Samsung cu South Korea ah a ngan bikmi riantuannak pakhat zong a si. A tar ngai cang i, a thi deng cangmi Samsung Group Chairman Pu Lee Kun-hee hi Samsung a rak dirhtu le thawktu Pu Lee Byung-chul fapa a si. A pa a dam lo caah hin, Samsung Group i riantuannak vialte hi Pu Lee Jae-yong nih tuanvo a lak chung i, tulio lutlai bik tiah an tinak cu a si. Forbes Magazine nih cun, a nupi he a then i fapa hnih ngeimi vawlei cung mirum bik 40nk ah an chiah. A ngeihmi hi USD $ 6 billion a si lai tiah an ruah damh.

Amah Samsung lutlai thongtlaknak nih hin, Samsung Company riantuannak belte cu zeihmanh donhkhanhnak a um lo i, rian thiam ciami le vawlei cung thiamsang lawngte nih an hruaimi a si ko tiah an ti.

Pensen bawmhnak tlaitu zong har a tong

A karlak ah, President kong le Samsung he pehtlai in, ziknawh le eihmurnak a um tiah National Pension Service (NPS) timi pensen lei tuanvo ngeitu lutlai Pu Moon hi an tlaih i, hlathlainak an tuah ve. South Korea ram i, pensen bawmhnak an khonmi hi vawlei cung ah a ngan bik 3nk a si tiah BBC nih cun a tial.

Biakhiahnak hmun?

Biaceihnak zung nih President a rian in dinhter ding ah biakhiahnak an tuah cu mipi lungthin a then colh. A cheukhat nih lawmhnak he an lam lio ah, mi cheukhat cu tahnak le mithli he an khat. Pi Park duh le duhlo an i then colh.

Hi hnu in zeidah a cang lai timi cu a fiang lo ngaingai, nain mipi lunglaknak an tuah ning ah uktu i thlen dawh a si-Leftward lei ah a thial men lai tiah an ruah damh. Cozah uknak a thlen i, left (kehlei ruahnak) ah a thial a si ahcun, South Korea nih pehtlaihnak phun dang deuh in a ngeihmi US le North Korea kong ah aa thlen kho men.

North Korea he pehtlaihnak an thatter deuh lai i, North Korea a pawng lei ah, Sehzung le a dangdang thanchonak an tuah khawh men. Cun, North Korea hrimhrim he zong pehtlaihnak a tuah deuh lai i, US-South Korea pehtlaihnak phungphai thar an sermi cheukhat hi an hnon than men lai tiah BBC Stephen Evans nih cun a ruahdamh.

President Pi Park te chung tuanbia le Pi Choi te chung pehtlaihnak

Atu lawng silo in, President Pi Park le chungkhar nih ramkhel ruang ah ngeihchiatnak fakpi in an rak ton bal cang. Pi Park Geun-hye hi South Korea ralkap le President hlun Pu Park Chung-hee a fanu a si. Pu Park Chung-hee cu ralkap lutlai General a rak si. Kum 1961 ah nawlngeihnak (anaa-ting-tu) a rak latu a si. Nain, South Korea rampi cu fak ngai in thanchonak a tuahtu le democracy lei ah thlennak a chuapitu pa bik pakhat a si. A biapi in, seh lei thanchonak a tuahtu pakhat a si.

Nain, President Pi Park Geun-hye i a pa Pu Park Chung-hee cu ram rian a tuan lio ah an rak thah. A pa lawng silo in, a hringtu nu tiang zong an rak thahmi a si. A pa hi amah pumpak humhimnak riantuanmi lila nih 1979 ah an rak thah. Zei ruang dah a rak thah timi bel hi nihin tiang a fiang lo. Amahbel, a rak thattu Korea CIA Director nih a timi cu Pu Choi Tae-min timi Pastor deu le zumhnak hmanlo hruaitu nih a rak khuh (influence) tiah a rak ruah.

Pu Choi Tae-min cu atulio Korea rampi buaibainak chuahpitu le firkhut in riantuantu nu Pi Choi Soon-sil i a pa si. Pi Choi hi tulio South Korea buaibainak vialte ah a hrampi a si tiah ruahmi nu zong a si fawn.

Cun, atu rian phuah a tongmi nu President Pi Park Geun-hye i a pa ralkap bawi le uktu saupi a tuanmi Pu Park Chung-hee an rak thah hlan ahhin, a nu an rak thah hmasa. A nu hi, Pi Park i a pa an thah hlan kum 5 ah an rak thah cangmi a si. A nu hi South Korea khualipi laifang ah North Korea tanhtu timi ruahmi nih meithal in an rak kah i, a thi.

Hi bantuk ramkhel ruahnak le uknak ruang ah nu le pa thah piak tiang a tuarmi nu Pi Park Geun-hye cu amah pumpak lila zong ramkhel a rak luhka ah sual a rak huah bal ve. Ramkhel biaruahnak le meeting an rak ngeih lio ah, namte in a hmai an rak ah i, hmun 60 tluk in an rak thit bal. An thitnak cu hmanthlak tampi zong ah hmuh khawh a si.

President Pi Park ruahnak petu: Pi Choi

Pi Park cu a nu le pa an thah thah hnu in, amah lawng a um. President a si tiang zong ahhin, umhar le lileng in a ummi a si ruang ah Pi Choi Soon-sil he hin an pehtlaih a tha. A bochan. Hawikom tha a ngeihmi amah pakhat lawng a si i, kum 40 tluk kommi an si.

Pi Choi Soon-sil i a pa cu Pu Choi Tae-min hi Pastor bantuk, zumnak deuh le hmanlo in a rak ummi a si. A sining hi phun khat lawng in chimh khawh a si lo. Atu le tu a thleng lengmangmi pa a si. Cun, nupi tampi a rak ngeimi zong a si fawn. Korea media nih an chim ning ahcun, a tlawm bik nupi voi 6 tiang a ngei tiah an ti. A min zong a thleng lengmangmi a si.

Pastor bantuk Pu Choi Tae-min hi Buddhist (Buddha) zumhnak in Christian (Khrihfa) zumhnak ka thleng a ti i, Zungzal Nunnak Bu (Church of Eternal Life) timi a rak dirh. Cu bantukin le lenglang a cawlcanghnak thawng in President Park te chungkhar he a rak i thei i, kommi an si. Cuticun, tleicia President hlun Pu Park le a chungkhar he siseh, a fanu Pi Park (atu President in phuahmi) he hin a ra hngal ciami an si. Culio te an hngakchiat lio hrim in, Pu Choi (pastor-deu a fanu), atulio South Korea rampi buaitertu, Pi Choi le President Park Guen-hye hi a rak i kom i, thang timi an si.

Asinain, Pi Choi he an i hawikomhnak le pehtlaihnak ruang ah President a sinak in a thlak lawng silo in, thong tiang hmanh tla kho ding dirhmun a phakter.

Theihternak: BBC English; December 2016 in March 9, 2017 tiang an tialmi zohchunh le cherhchan in tialmi a si.