Ramkomh Kawlram Le A Fiang Lomi Daihnak Lamthluan

Chin National Dialouge, Thantlang 2017 (Credit: CND-FB)

Kum 60 leng a rau cangmi Ramkomh Kawlram buaibainak cu remdaihnak taktak a um khawh nakhnga tiah 2011 President Pu Thein Sein cozah a kai hnu in, nihin Pi Suu Kyi nih hritlaihmi NLD cozah tiang ceikhannak an hun peh thluahmah. Timhtuahnak bantukin kan hnu thla (August) dongh le thla (Sept.) thawk ah ram pumpi huap in 21st Century Panlong/Union Peace Conference tuah a si. Cucu, kan ram ah kum 60 leng a cangmi kong ceihkhan ding in timhtuahnak an ngaih dih hnu in a cangmi kan ram sining zoh tik ah lungduh a si hrim lo.


Kan ram remdaihnak a um lo ruang ah harsatnak zeitluk in dah kan ton, chim hau lo a si. Kan rampihuap in zoh hmanh a hau lo. Kanmah Chin miphun chung lawng in fiang tein zoh khawh a si. Rampi a buai hnu in, innpa ram a simi ah kan zam, ram hnihnak in ramthumnak tiang kan phan. Nihin ah Malaysia lamlaklawh lawng hmanhah Ramkomh Kawlram in Ralzam, Sing 2 tluk deng an um, cu chung ah Chin miphun in 50,000 tluk kan um lai tiah, kan hnu CD Vol. 2, No. 3 ACR Chairman he biaruahnak ah a langhter. Cu bantuk thiam in, Thailand ramri le ram chung ah siseh, a dangdang ah tlikzam cio dih a si. Ram chung ah remdaihnak a um lo ruang ah tlikzam lawng ah siloin a lamkip in thanchonak vialte a pit dih. Kan ram ah, fimcawnnak tha kan ngei lo, nitin pawcawmnak ah har kan tong, thinphang le thlalau in khua kan sa. Kan ram ah daihnak a um lo kan ti tik ah, kahdohnak a um lawng kha silo in, kan lungput le kan chung muru ah daihnak le hnganamnak a um kho lo. Hi nihhin, rampi thanchonak a hrawh lawng silo in, thinlung thanchonak tiang zong a hrawh. Hiti a kalnak hi, kum 60 lengkai a hung si cang i, kan ram cu vawlei cung ram ah a niam bik, sifak bik, thangcho lo bik, kan phanhnak le hawitluklo kan sinak caan zong a sau cang. Hi vialte chung in kan luat khawhnak hngading caah zeidah a herh hmasa bik tiah cun, kum 60 lengkai simi ramchung raltuk buainak daihter hi a si. Remdaihnak a um lawnglawng ah zumhngamnak a hung chuak lai.

Nihin vawlei tuanbia ah sifaak bik le thangcholo bik ram pawl hi remdaihnak a um lonak le ramchung ah kahdohnak le buaibainak a ngeimi lawngte an si. Tachunak ah, UN nih May 2016 ah vawlei cung ram thangcholo bik a thimmi chung ah, kan theih dingmi cu Asia in, 1971 thawk in Afghanistan, 1991 thawk in Cambodia, 1975 thawk in Bangladesh, le Africa le ram dang in 50 tluk an i tel. Hi ram pawl sining zoh tikah, an ram chung ah daihnak a um lomi le buaibainak he a khatmi lawngte an si. Kan ram zong 1987 thawk in vawleicung sifakbik ram ah telh a rak si cang. Nihin tiang kan ihlip kho lo. Cun, remdaihnak kan tikah ral tuk um lo lawng a si lo. Mipi lungthin ah humhim le hnangam (secured) a herh. Fale ca le thaizing eikhim pawcawmnak ding caah thinphan lo a hau. Hi bantukin buaibaimi ram chung ah UN nih a hmaithlakmi remdaihnak serning cang pathum a um, cucu Remdaihnaktuah (Peace-making), Remdaihnak Kilven/Zokhenh (Peace-keeping), Remdaihnak thanchoter (Peace-building) timi pathum hi a si. UN cathanhpi (charter) ah langhtermi a si bantukin, ahohmanh raltuk ruang ah harsatnak in lo ding kha a hmaithlakmi a si. A fawinak in cun, vawleipi ah remdaihnak ser, zohkhenh le thanchoter tiah kan ti khawh. Cucu, kan nih ram cu a dotkhatnak a simi remdaihnak hman kan tuah kho rih lo. Kan ser kho rih lo. Cucu remdaihnak ser khawh hnu lawng ahcun, a dikfelmi uknak phung, phung zulfelmi cozah, a zalongmi ram le zauk phung hi a qhangcho kho tiah an ti. Tutan ah, Pi Sui Kyi nih a pa ro bantukin a ruahmi Panglong hnatlaknak hngatchan in, rampi daihnak cu Kumzabu 21 Panglong Conference tiah a cozah tlaitu an si cangka min a pek. A taktak ahcun, NLD nih teinak kan hmuh ahcun tiah an i hmaithlakmi cu Rampi remdaihnak ser timi si hmasa loin, Phunghrampi remh ding titu a rak si deuh. Nain, NLD thimfung lemsoinak a chak cu an mer riangmang i, remdaihnak tu an hung i hmaithlak.  Rampi daihnak a chuahter taktak lai maw, chuahter lo timi cu ruah a hau ngaimi a si. Cucu ruah a hauhnak zawn cu a fianlonak zawnte a si fawn. Teinak hmutu cozah nih an uk khawhlomi hna Ralkap an um rih caah za ah za (100%) in zumh dih ding cu a har hringhran. Remdaihnak kan ceih lai tiah timhtuah lio zong ah kahdohnak cu a um lengmang fawn. Nihin nitiang kahnak thawng a dai lo i, buaibainak in a khat ko rih. A bik in, Kachin le Rakhine ramkulh hna ah an si i, hmun dang zong ah buainak a um liangluang. Kahdohnak lawng silo in, cozah nih an nawlngeihnak hmang in, thawnglatu pawl duhpoah in ta-za-cuai zong an tuah hna. An buaipi hna! Ralkap cozah chan bantuk he dang lo in, thawnglatu caah zalonnak taktak a um kho lo. Ruah ah khuaruahhar le vansang a si ko! Nain, biaruahnak ngeih hrimhrim lo in, zumh dihlo zong cu kapkhat lei ah a si kho ve lo. Cucaah, biaruah ding in, tlangcung hriamtlai phu zong an lungtling dih khan a si cang.

Lungtlin dih khan a si kan ti tik ah, a fiang lo ngaingai. A hram thawk, Pu Thein Sein cozah he mah le ramkulh cio in, biaruahnak le minthutnak ngeih ahcun, a tlamtling ngaimi a lo. Nain, a bupi in ramkomh cozah he hnatlaknak ngeih ding ti ahcun, nihin ni tiang a fainglo ngaimi lamthluan cung ah a um ko rih. A um ballomi kumzabu 21 remdaihnak zong min an thut. Cu minthut a thawhmi minung pawl cheukhat zong nih zeirello in an ngut tak dih hna. Kawlram remdaihnak lamthluan fian a har ngaingai ko. Cuti remdaihnak lamthluan ah Aung San Suu Kyi hruaimi NLD an kalpi ning a lungtling lomi minung an karh chin thluahmah. Kawlram kong ah mithiamsang pakhat nih cun, Suu Kyi nih remdainak kong ahcun, zei ngaingai hman a tuah khawhmi a um lai lo. A ti khawh bik ah, Ramkomh Remdaihnak Kawnferen (Union Peace Conference) kha kumzabu 21 Panglong hei chap tbk. le Myanmar Peace Center (MPC) kha Myanmar Peace and Reconciliation Center (MPRC) ah thlen tuktak lawng a si ko lai tiah a rak chim.  Cu nih a langhtermi cu ASSK hruaimi NLD cozah nih zei ngaingai an tuah kho lai lo timi a si. A ruang cu, kan langhter cang bantukin Ralkap nih nawlngeihnak tamtuk an ngeih rih caah a si. A donghnak ah kum 60 leng ram chung ah meithal tlaih in buainak nih a chuahpimi zawtnak vialte hi hmakhatte le voikhatte ahcun damh khawh cu a si hrim lai lo. Hihi kan ram, Ramkomh Kawlram remdaihnak lamthluan a fianlo nak pakhat cu a si. Atu ah dinti khor cawh in a tu ah din colh a ngah lo an ti bang, ni zaan tihni kaimi nih kan tuah lai an timi kha an tuah taktak khawh le khawh lo kha nihin an kan tep kho lai lo. Cun, cozah le hriamtlai phu nih hnatlaknak an ngeihmi vialte hi zeitikdah a tak in, hman le hmuh chuah khawh an si lai timi zong hi a fianglomi pakhat cu a si.  Cucu nakin a fianglo khunmi cu cozah nawlngeihnak in remdaihnak NLD nih Tlangcung miphun a ceihpi cuahmah hna Ralkap nih heh tiah a rak thuat thluahmah hna i, Ralzam thongtampi an phanhmi hi a si. A fiang lomi remdaihnak lamthluan in zeidikdah Ramkomh Kawlram a hlip khawh te hnga timi ruah buin…,

Salai SH Lian

Theiternak: ACCF, Australia Kum 10 tlinnak Magazine caah ka rak tialmi a si.~