Na Caan A Phante Ko Lai!

New York khi California nak in suimilam 3 tluk a ran deuh ruang ah California hi a zeipaoh ah New York nakin a nuar deuh tinak a si lo. An khua hnih in anmah le an Caan 'Time Zone' tein an cawlcang i, ṭuan mi a si.


Cheukhat cu a sau ngai an ‘Tlangval/Nungak’. Cheukhat cu tuante ah nupi le pasal an ngei, nain fa ngeih ding caah kum 5,10 tluk an hngak. Asinain, cheukhat cu tlai deuh ah an i ngei nain tuante kum khat chung ah fa ngei mi an um fawn.

Cheukhat cu kum ngakchiate 19, 20 tluk ah Degree pakhat an ngah, sianginn kai an lim. Nain rian ṭha hmuh nakding caah kum 5 tluk an hngak. Cun, a cheukhat cu kum 25, 26 tluk ah Degree an ngah, sianginn kai an lim, nain an lim cangka in rian ṭha an hmu colh. Cheukhat cu kum note, kum 25 tluk ah CEO/Director (rian sang) an phan nain kum 50 tluk an si ah an thi. Culioah cheukhat cu kum 50 tluk ah CEO/Director (riansang) an phan i, kum 90 tiang an nung ko.

Cucaah, a hopaoh hi anmah le an Caan ‘Time Zone’ cio in a cawlcang mi le tuan mi lawngte an si. Cu nih a langhter mi cu mi zeipaoh hi mah le kehlan, kekar le khap cio in an cawlcang.

Na rianṭuanṭi, na hawi, na sianginn kaiṭi, cun nangmah nakin ngakchia cheukhat cu nangmah na hmai ah a kal chung in phan chung mi ‘an lo’ kho men. Cheukhat cu nangmah hnu deuh zong ah a um mi “an lo” kho men.

Zei a si paoh ah, nahchuah duh hna hlah, a soi zong soisel in namneh fawn hna hlah, anmah le caan 'Time Zone’ te ah a um mi an si ko.

Nangmah tein um ko, na thazaang ṭhawng fawn, na sining te ahkhan i hngat ko. Nangmah na ṭhatnak caah zeipaoh amah le caan te ah a tling ko lai. A ṭha ko lai. Nangmah na caan te ah na um ko.

Hi a tanglei tuanbia te hi hun rel ta hmanh;
Kum 5 telawng a si ah, hringtu a Pa nih a thih tak.
Kum 7 telawng a si ah, naule zohkhen pah in a nu nih rawlchuan a rak fial i, a rinh cang.
Kum 16 [telawng] a si ah, a duh mi sianginn cacawn a chuah tak.
Kum 17 [telawng] a si ah, rian hmun phun 4 in rian a chuak cang.
Kum 18 [telawng] a si ah, nupi ṭhit in inn chungkhar a dirh.
Kum 18 in 22 karlak chung, Tlanglawng zohkhenhtu rian a rak ṭuan.
Kum 19 a si ah hringtu Pa pakhat dirhmun ah a hung phan. Nain,
Kum 20 a si ah, A nupi le fanu nih inn in an chuah tak.
Ralkap chung ah a lut nain, caan raulo te ah an phuah ṭhan colh.
Upadi sianginn kai ding aa zuam nain sianginn nih luhnak nawl an pe lo.
Insurance Company ah rian a ṭuan ṭhan nain, tlamtlinnak a hmu kho hlei lo.

A hnu ah cun, Rawldawr hmete pakhat ah rawlchuangtu le kheng ṭawltu rian a rak ṭuan. Kum 65 a si ah, Pensen a la. A rian aa din. 

A rian aa dinh ni ah cozah sin in Pensen bawmhnak a hmuh mi cu US Dollar $ 105 telawng a rak si. Pensen bawmhnak a hmuh mi, $105 telawng hi pei ka nun man le ka santlaihnak a si ko hi. San ka tlai lo e, tiah lungfak, ngaihchia ngai in a um lio ah, amah le mah nunnak lak ding tiang khua a rak ruat.

Cutin, lungdong ngai in thingkung pakhat tang ah ṭhu in khua a ruahmi cu:
Thih lai biarohvuih capar ṭial nakin, ka nunchung ah ka tuah rihlo mi tu pakhat hnu pakhat in hun ṭial ning a ti. Pakhat hnu pakhat a hun ṭial.

Cuticun, a lung ah a hun chuak mi cu hawi dang nakin a thiam deuh mi pakhat a um kha a si. Cucu, kum 7 a si lio in, a tuah cang mi 'Rawlchuan le Mehkio' kha a si. Cuhnucun, pensen bawmhnak a ngeih cia mi leng in USD $ 87 cu a cawi chap.  Amah tein rianṭuan hram a thawk. Cucu, amah nih a thiam bik mi 'rawlchuan le mehkio' ning daan in 'Arsa Kio' kha a si.

Kentucky khua ah a rak thawkka te ahcun, a rak fawi hrim lo. Lam kam le amah umnak pawng, Inn khat hnu, inn khat kal le lut in,  "Arsa Kio" zuar hram cu a rak thawk.

Kum 65 a si ah, amah le mah thah in nunnak lak ding tiang a rak i tim mi a si ko. Nain, a kum 88 a hun tlin cun, Billion Dollar a ngei mi mirum ah aa chuah. Atu ahcun, Colonel Sanders nih a rak thawk mi "Kentucky Fried Chicken (KFC)" timi 'Arsa Kio' dawr cu vawleicung ram 123 tluk i khualipi kip ah a um dih nawn cang. Vawlei cung ah a ngan bik pahnihnak Rawldawr tiang ah aa chuah cang.

Cucaah, Nangmah pumpak zong ah 'Teinak Hmuh Ding Lam' a um ko.  A herh mi cu atu tein ralṭha ngai in, Thlennak na tuah i, na thawk colh a herh.  Vawleicung ah minthang bik le rum bik na si lo hmanh ah, nangmah tawk in a hlawhtling mi cu na si hrim ko lai!
Na tlai lo… Na rang fawn lo… Nangmah na caan te ah na um ko!

Nangmah caan te ah na um ko.
You Are In Your Time Zone.

Edited by Salai Kep Chin Thang (TABC Authawng caah a tlak ning in a remh/edit thanmi a si)
Idea credit: Original Developer