Kan Nunnak Ah Pathian Nih A Kan Duh Piak Mi (God's Will In Our Life)

Baible Cangthim: I Thesselon 5: 16-18

16 A zungzal in i lawm u, 17 A zungzal in thlacam u, 18 Zei bantuk thil nan ton hmanh ah lunglawm in um u. Khrih Jesuh chung i nan nuning ah hitihin nung hna seh, tiah Pathian nih an duh hna.

1. Kan nunnak ah Pathian nih a kan duh piak mi cu zeidah a si? (What is God's will in our life?)

1.1 Verses: 16, 18; A zungzal in i lawmh le Zei bantuk thil kan ton hmanh ah lunglawmte in um kha a si. A si ahcun, bia hal ding a ummi cu nangmah lei keimah tah a zungzal in kan i lawm kho maw?

Biahmaithi: Voikhat cu Pastor (Dr Marlayna Schmidt) pakhat nih a luancia mi kum 23 Bible Sianginn (Seminar) a rak um/kai lio i thil pakhat a tonmi kong kha thawngtha chimnak cauk ah a tial. A timi cu, an Professor pa pakhat nih thlacamnak ah thiltha/ thilchia/ harnak le leirawinak an tonmi vialte caah khan lunglawmhnak a chim. Pastor nih a theih tikah a lung a tuai tuk i, thlacam dih cun a hei ton. A hal mi cu thla na cam mi kha ka theih palh sual hnga maw? ka palh sual lo ahcun, Leirawinak (treachery) kan tonmi ca zong ah lawmhnak na chim kolo maw? tiah a hal tikah a leh mi cu a si ko tiah a ti. Oh..! ka ti i a fiangmi bantuk in ka um ter. Asinain khua ka ruah mi cu zeitihdah leirawinak kan ton mi cu Laksawng/ thluachuah (gift) a si khawh lai ti a si. Cu lio ah, professor tha a si bantuk in biahalnak ka tuahmi cu keimah tu a ka hal than ai....! Ka leh mi cu, Aaa…! ka fiang kho deuh lo, ka rak i ruah rih a hau lai e ka ti, tiah Pastor pa nih cun a thawngtha chimnak cauk chung ah cun langter. Cuti cun, Paul cakuat, atu kan Bible thim a si mi Thes. 5:16-18 he zohchih bu in kum 23 a ruah hnu ah a chuak than rih mi bialhalnak cu; Thil kan tonmi a that lo lio, sungh zatlak lio, chimpit vansang in um lio, harnak le leirawinak kan ton caan hna tbk ah cun…, Zeitindah kan i lawmh zungzal khawh lai? Zeitindah thla kan cam zungzal khawh lai? Zeitindah lawmhnak bia cu kan chim khawh lai? A chim hmanh hei chim ko u si law bia-eng or lungtak lo bia hna a si sual hnga maw. Asile zeitindah Biaeng le Velhle silo tein kan chim kun lai? Bawipa ka lawm tiah kan ti ko men hnga asinain keimah zoh chih in vun chim ning ko ning law thil siseh ti ka duh ning a silo lio caan ah cun; Kan chim hmanh ahhin kan velhle/biaeng hna in hin Bawipa ka lawm kan ti sual hnga maw? Ka tihtuk mi cu ka thlacam thawng hna hi Bawipa caah Biaeng le Velhle bantuk hi an si sual lai tihi a si.

A zungzal in i lawmh le zei bantuk thil kan ton hmanh ah lung lawmte in um u, a ti tik ah hin, thilri chia pipi le thil tha lo vialte khi kan va duh dih, zawtnak, vanchiatnak le a dangdang thil thalo kan ton mi vial te khi va duh dih ding kha a timi si lem lo. Cun, hi bantuk kan ton lio ah hin thinhung lo le hna a hawnh lomi bantuk in i um ter ding zong kha a si fawn hlei lo. Asinain, kha bantuk Harnak a phunphun hna chung in Pathian kha cohlan, bochan le lawmh hram kan thok bak cun thil tha duh nung le cawnawk hna kan hmuh thluah mah ko lai.

Voikhat cu Pathian mihman ngai mipa kha a haapi (molar) afak i hitihin thlacam anti, "Bawipa, ziah ka haa cu na ka fah ter na thawngtha bia zong ka chim kho ti lo, ka ha a fah tik ah bia ka holh kho lo i, na rian/thawngtha zong ka tuan/chim kho lo tiah," zai pah in khin thla a cam an ti. Thla a cam dih cun a lungthin chung ah bia a hung chuak mi cu, "ziah na haapi pakhat te a fah ko ruang ah cu tluk cun na zai? A dang a tang mi na haa sawmthum le pakhat caah khan tah lawmhnak na chim hlei maw timi biahalnak a si anti". Nang le kei tah cu bantuk hna kan si ve sual maw?

Job tuanbia tawite in vun zoh than hna u sih, Job 2:1-10 ah tlingte in kan hmuh mi cu Job kha zei bantuk harnak a ton le a intuar hmanh ah lunglawmte in a cohlan kha kan hmuh khawh. A nupi nih na Pathian cu vawlpam law thi ko cang a ti lio ah a leh mi cu, "A hrutmi nu bantukin pei bai na chim cu. Pathian kut in thatnak kan hmuh i that lonak zong kan hmuh awk a si ve hnga lo maw? tiah a lehnak kha kan hmuh. Cu ve bantuk in nang le kei zong zei bantuk thil kan ton hmanh ah, a thatnak lei khel in a hmu kho mi le lawmhnak a chim kho zungzaltu si khawh le zei thil kan ton hmanh ah hin a cohlang thiam mi kan si cio nak hnga thlacamnak in i zuam cio hna u sih, tihi a hmasa ah vun chim ka duh. Cucu Pathian nih kan nunnak ah a kan duh piakmi cu a si i, harnak phunzakip le hremnak fak ngaingai a ingtuar mipa, Khrih saltha Paul cakuat chung ah kan hmuh khawh mi cu a si.

Biahalnak: Nang le kei tah kan biakmi Pathian a sin ah lawmhnak biachim kan daithlang saul maw? A cohlan zia kan i palh sual maw? tihi vun i check ta hna u sih ti ka duh.

1.2 A Zungzal In Thlacam U (or) Donglo/ngollo In Thlacam U (Pray continually or Pray without Ceasing) hi a si?

Donglo le ngollote in thlacam hi kan nih Khrihfa mi hna nunnak ah le Pathian he kan i pehtlaihnak ah a biapi taktakmi, kan nunnak lampi pakhat a si. Cun, vawlei cung kan nunnak chung i thil ti khawhnak hnga hrimhrim caah a biapi tuk fawn. A si ahcun “a zungzal in thlacam (or) donglo le ngollo in thlacam u” ticu zeidah a chim duh le a sawh duh mi a si kun? What does it mean to pray continually or pray without ceasing?

1.2.1 Donglo le Ngollo Thlacam Nih A Chim Duhmi Cu:

Khirhfa hna nih hawi dang he i lo lote in, kan kut kan i sih, kan lu kan khun, kan mit kan i chinh hi a silo tiah al khawh lo mi a si. A hman cun, thlacamnak caah a caan dangte in kan pek i Bawipa he i chawnh biaknak, nawl halnak, thlachuak halnak, tbk., hi a biapi tuk mi Pathian he kan i pehtlaihnak a si. Asinain, a zungzal in thlacam or Donglo le Ngollote in thlacam u ti nih a sawh duhmi le a chim duhmi cu, kan tuah tawn ning le ti tawn ning zulh in tuahmi thlacam (or) Phung ning zulh in tuahmi thlacam (reciting ritualistic patterns and forms of prayer) tikha a sawh duhmi siloin le kan caan vialte sml. 24 chung thlacam ding kha a si fawn hlei lo.

A zungzal in thlacam (or) Donglo le Ngollo in thlacam nih a sawh duh taktak deuh mi cu: a si than lengmang mi (or) a um than lengmang mi (or) a caan hmante in thlacam (Recurring Prayer) kha a si deuh. Dinh lo in thlacam (Non-Stop Prayer) ding kha a si lo. (e.g. Kan inn chung khar cio zing rawl kan eih dih cang i leng ah chuak in zungkai, riantuan, sianginn kai, tbk., ah maw kal ding kan si cang i khi bantuk caan ah Pathian sin ah Bawipa nihin chun ka caan hman ding vialte na kut ah kan chanh nangmah nih lam ka hruai ko...) tiah Bawipa sin ah caan hmaante in fuh panh zungzal i thlacam nun ngeih ding kha a kan fial mi a si.

1.2.2 Thlacam Nun Ngeih Ding Kha A Si:

Thlacam hi kan nunnak a biapi tukmi kan lampi pakhat a si bantukin thlacam duhnak lungthin ngeih peng zungzal awk le thlacam nun ngeih ding kha a chim duh bik mi cu a si. Cun, thlacam kan ti tik ah cam lawng cam (hal lawng hal) i mah lei in zeihmanh timh tuah nak um lo ahcun a si kho mi a si hnga maw? (Empty hand can't multiply) tiah a Falam ZTC sayapa nih a kan cawn piak bal. Kei zong nih ka uar ngai ve mi cu, (Kawlholh: Suhtawng yin le lohsawng, lohsawng yin le Suhtawng) "Thla na cam zong ah tuah law, na tuah zong ah thlacam" A chim duhnak cu na tuah sernak lawng kha i rinh hlah ti kha si. Tahchunnak ah Saingngakchia pakhat nih Ca zoh lo bak in Bawipa awnnak teinak ka pe ko ti seh law a si kho lo bak mi a si. A awnnak ding caah cun, Thlacam zong a hauh bantukin Ca zong kha a zoh ve hrimhrim a hau. Kan halmi kha a cohlan zia thaim hna u sih. Kan Bawipa nih Cangreu a kan pek mi kha Lung hmuh in kan hmuh tawn i, Nga a kan pek mi kha Rul hmuh in kan hmuh tawn, a cohlan kan i palh sual tawn.

Hika I Thess. 5:17 nak i A zungzal in Thlacam u, a timi hi a dawh tukmi le a tha tuk mi a suallam an um len ko lai nain, a hmasabik le a fawibik mi a suallam taktak pakhat cu: Pathian fialmi le nawl pekmi a si. Cu nih a chim duh mi cu kan Bawipa nih a tlingmi timh piak (or) khan piak cia mi a ngeih. Cu caah thlacam nun ngeih kan hau. A silo i, Thlacamnak hi hmanhmante in kan ngeih khawh lo le Lawmhnak chim kan daithlan sual a si ahcun Pathian nih kan ca i a kan timh piak cia mi co ding le hmuh ding tlak in kan co hlang lai lo ti cu al awk tha lo in a fiang mi a si.

Biadongnak: Nan theih cio bantukin a caan hmante in thla kan/nan cam lio caan ah Satan tukforhnak le temtawnnak chung in kan i hla i thlacam kan daithlan le kan der thawm caan ah tukforhnak phunphun nih a kan chuah hnawh theu. A ruang cu thlacamnak in Bawipa he kan i peh tlaih caan ahcun thiang thlarau nih a kan umpi thipthep caah a si. Culawng sirih lo, zei zong vialte tluangte in a kal kho. Cu caah, Thlacam nun ngeih le Lawmhnak bia chim hi dai-thlang hrimhrim hna hlah u sih. Hihi Kan (Ka/Na) Nunnak Ah Pathian Nih A Kan Duh Piakmi cu a si.

Ka palhnak le ei khawh lo mi a um sual ahcun keimah mawh sisehlaw Pathian nih kan ngaithaim hram ko seh. A tha mi um si ahcun kan zapi caah Pathian nih thluachuahnak kan pek piak ko seh. Amen.

Ka lawm.

Salai SH Lian