Thilhmete: Ebola Zawtnak In A Zawmi Dr. Kent Brantly A Zawtnak In A dam; Pathian Nih Ka Nunnak A Ka Khamh Tiah A Chim

Friday, August 22, 2014

Ebola Zawtnak In A Zawmi Dr. Kent Brantly A Zawtnak In A dam; Pathian Nih Ka Nunnak A Ka Khamh Tiah A Chim

Dr. Kent Brantly; A dam hnu ah Emory Sizungpi Press Conference
ah Lawmhnak bia chim lio

Dr. Kent Brantly le Nancy Writebol cu Ebloa zawtnak in an dam i Atlanta i Emory Sizungpi in an chuak cang tiah theih a si.

Kum 33 a simi Brantly nih atu bantukin ka dam khawh ni hi cu, “Khuaruahhar Ni" a si. Ka nun khawhmi le chungkhar he tonnak ka hmuh khawh thanmi hi kaa lawmh tuknak ah a ther in ka ther. Cun, “Pathian Nih Ka Nunnak A Khamhmi a si” tiah Emory Sizungpi ah Thawngzam Fianternak (Press Conference) an tuahnak zong ah a chim.

"Ebola zawtnak rungrul an pum chung ah a um ti le um ti lo hngalhnak caah an pahnih ning in an zun le an thi hneksaknak kan tuah than hna. A saupi thlopbulnak phun tampi in kan tuah hnu le hneksaknak tampi kan tuah hnu ah Dr. Brantly cu Ebola zawtnak in a dam cang i a chungkhar le mipi (community) sin ah a tlong kho than cang lai" tiah Emory Sizungpi in director pakhat Dr. Bruce Ribner nih nihin zing ah a chim.

“Cacawn nihnihni sizung in ka chuah lio ah Writebol nih a mah aiawh in mizapi sin ah thlacam cah piak ding le lawmhnak chim piak ding in a ka a cah tak. Sizung khandal chung in ka chuah bak in, ka chim khawhmi cu “Pathian Min Thangthat Siko Seh” tilawng a si" tiah Brantly nih a chim.

“Dr. Brantly le Mrs. Writebol an dam khawhmi cu kan i lawm tuk hringhran. An pahnih in an ngamhsan ralthatnak le biakhiahnak an tuahmi cung ah an pahnih in an dam khawhnak hnga ding caah a cawlcangmi sibawi kan zapi in kan i lunghmuih dih. An zumhnak le ruahchannak nih kan zapi in thazaang a kan pek ngaingai” tiah Ribner nih a chimchap.

Ribner nih a chim rihmi cu, mipi nih an pahnih Ebola zawtnak rungrul ruang ah tihphannak nganpi kan ngei, asinain, mipi ngandamnak he pehtlai in mizaw chuak pahnih sin in zeihmanh thinphan ding a um lo tiah a ti.

Cun, Brantly le Writebol an pahnih in America ah ratpi in zawtnak thopbul tuah ding in biakhiahnak an rak tuahmi hi an thiam ngai. A ruang cu hmailei ah zeitindah Ebola zawtnak in aa chawnh cangmi hna caah thopbulnak kan tuah hna lai timi kherhlainak thar le thiamnak thar zong kan ngah tiah a ti.

Dr. Brantly; Africa ah Ebloa zawtnak in a zawmi a bawmh lio hna

Brantly nih Ebloa zawtnak a ngahnak a ruang cu, mibawm phu a simi Samaritan’s Purse timi he Liberia ram ah Ebola zawtnak in a zawmi hna chiahnak ah rian a tuannak in a si. Ebola zawtnak in a zawt hnu ah Writebol he an pahnih in US lei ah thopbul ding an an rak rat pimi hna an si.

“Atu bantuk dirhmun ah ka phan lai tihi ka ruat balbak lo".

July 23, Nithumni zingka ka thawh cu ka taksa pum umtu a hman lo ka ti ah cun, Ebola zawtnak in ka rak zaw diam cang. Liberia ram ah nikua chung ka ihkhun cung ah ka ngal ko i, nikhat hnu nikhat ka zawtnak a zual deuh chin thluahmah. Ka zawt ko bu zong in le ka thih tiang zong zumh awktlak saltha siding ah Pathian sin ah thla ka cam” tiah Brantly nih a chim.

Brantly hi US ram ah Ebola zawtnak in thlopbul hmasa bikmi a si. Cun, vawlei cung minung vialte lak zong ah a hmasa bik serum tiah theihmi ZMapp in damh ding in an hneksak hmasa bikmi a si.

“Brantly cu Serum (ZMapp) si pek hnu in khulrang ngai in a vun dam deuh thluahmah, asinain, hiti a dam khawhnak hi serum si pek ruang ah a si le silo bel cu a fiang lo” tiah Samaritan’s Purse nih a ti.