Mitcaw Ka Hawipa Zong Facebook A Hmang

Sianginn ah ka umlo a tam ngai. Nai hrawng inn lei ka tlun le khual ka tlawn a um pah. Sianginn ka hawi le he zong kan i tonlonak a sau pah hnu ah kan sianginn cu damte in ka hei phan ṭhan. Khual ka tlawn karlak ah ka hawipa (ka umttimi- roommate) sin ah Inn-tang i Mitcaw ka hawipa nih cauk cehnak (Stapler) a rak hlan. Inn-tang Mitcaw ka hawipa cu kut ṭawlnak khan ah kan i tong i ka aw a ka theih bak in na cauk cehnak (Stapler) keimah sin ah a um tiah a run ka chimh. Ka herhnak a um rihlo caah lak lo in ka um. Sianginn zarhkhat hrawng ka kai hnu ah ca ka tuahmi tete a tam pah i Inn-tang Mitcaw ka hawipa sin ah cun cauk cehnak hei lak ding ah cun ka kal.

Zaanriah ei dih kan khim hnu tlawmpal ahkhin Inn-tang Mitcaw ka hawipa sin ah cun Cauk cehnak (Stapler) lak ding ah ka hei ṭum. A inn-ka cu fek ṭhup in a rak i hrenh. Ramnihal, Ramnihal tiah voihnih hrawng ka hei kawh hnu ahkhin inn-ka cu a rak ka on. A umnak khaan chung ka luh cu a computer a rak i ong. MTNL- Wireless Internet Connection in Online ah facebook le Gmail he a rak i tuai len ko. Zei a tuah ngaingai cu ka hngal lo. Khah! ALian, ṭhu rih. Zaangfahnak tein facebook ah mi na khum piak lai (Friend Request tuahpiak). Aw! Ngah ko ka ti. Ka vun zoh piak i ka tuah lai ka ti cu a ngah lo. Ziah zeidah cang ka ti, a connection cu ka hei check cu a rak i peh lo.  Connection ka peh. Facebook account cu luh ding ka hei on piak password ṭial a hauh caah keyboard ka pek. Cun, password cu a ṭial. Facebook a luh dih cun, hmanthlak a cuangmi cu ka hei zoh cu a mah a si lo. A hodah a si tiah ka hal cu ka Nungak a si a ka ti. Hmmm! Na ka tei hih tiah ka lungthlite in keimah le keimah ka ti. Friend request cu ka tuah piak dih. Cun, a nungak nu profile zong ka hei remh piak pah. A profile cu zeitindah a si tiah cun, a min ah Anchal Singh, Student, MA in Hindi Final Year (Delhi University) ti a si ko. A chuah thla an ṭial cia mi an palh ruang ah remh ding in ka hei zoh cu a si. A chuah kum ka zoh i, 1990 chuak a si. Kum 22 lawng a si rih tinak a si. Keimah ka kum ka vun ituak, Um…! Na ka tei ṭhiamṭhiam ve ka ti ṭhan hoi.  Hmmm…! Mitcaw le Mitcaw zong an ni duh ko. Cun, facebook zong an hmang. Ka khuaruah a har ngaingai ṭhan. Ka hawipa cu a nungak nu friend request tuahnak ding le a chuah thla palhmi remh piak ding ah a sau ngai rak buai cang dawh a si. Computer a hman ning hi i ziak a um lo ngai. A screen khi a dang. A holh kho mi software an chiah ruang ah a si lai dah. Khua a hmu lo mi nih an hman mi computer a hmu bal mi nih cun nan theih lai ka zumh.

Atulio sianginn a kainak zeidah a lawh kong hna ka hal. Ca zohawk thilri (Study Materials) a ngaih le ngaih lo ka hal i lungrawk ngai in cazoh awk study materials a harnak kong a ka chimh.  Hindi in a cawngmi caah i a harnak kong le a hlei in Mitcaw caah a tlawm tuk a ti. Hmmm…! Zeitiawk ṭha mu. Ca a zoh ning hi khua ruah har ngai a si ko. Tape le CD in ngeih bak a si. Cun, Examination phan hlan ah hin, Delhi University nih tawlrel piak in Sianghleiruun Siangngakchia nih Volunteer in an rel piaknak hna  a um. Cucu hmun ahcun Examination lai ahhin cun a va kal tawn.

A dang khuaruah har mi pakhat a um rih ṭhan hoi. Naite cu khual a tlawng an in ti cu a si maw tiah ka hal. Aw! ……… khua ah State Bank of India (India ram in Bank ngan bik pakhat a si) i cazi (clerk) sikhawhnak ding ah hneksaknak (examination) tuah ah ka va kal ta a ti. Asinain, exam a tuahmi cu a lung khan a si hrimhrim rua lo. Khual a tlawn hi a mah lawng in a si. Delhi in zaankhat tlanglawng in kalnak khua ah a si. A mah lawng in a choi thluahmah ko. Umm..! Ral ṭhat lei zong ah na ka tei ka ti… A result bel cu atu in thlathumnak ah a chuak ding a si i Result ka hngak chuahmah ko a ti. Cucu, State Bank of India ah a luh khawh  a si ahcun, sianginn a dih le caangka tein din lo bak in rian ah a lut colh lai tinak a si.

Hi! Ka hawipa  ka hmuh ahhin a caan ah ka ngaih a chia. A caan ah thaazaang laknak ah ka hman tawn. A tu kum cu, kan hostel (asawng) zong ah Mitcaw an tam ngaingai cang. Mitcaw nih BA, MA, le M Phil tiang an cawng. An izuam taktak. A nunnak ding caah Mitcaw ka si, ka mit khua hmu lo tiin a sung an pe hrimhrim lo. An mitcawtnak kha i sonhtarhnak (acawngpiak) ah an hmang hrimhrim lo. An sikhawhnak bik chung in a ṭha bik in hman khawh an i zuam.

Ka chuah lai ah, a tuhi zeidah na tuah lai tiah ka hal i, Online ah cazoh awk (Study Materials) ka kawl lai tiah a ka leh.+++

Theiternak: Hi Mitcaw tiin ka ṭial lengmang mi hi hmuhsuamnak le zawmhteihnak ruang ah a si hrim lo i thaazaang rak la cio hna u sih timi hmuitinh he a si.

Salai SH Lian

15102012