Phunghrampi Remh Hi A Si Kho Maw?

[Atu nai hrawng i], kan ram chung ah caihphai bikmi (hot issue) cu Ramkomh Kawram, 2008 Phunghram remhṭhannak ding kong a hung si. Kan ram Parliament, Upper House (Amyotha Hluattaw) nih cun 2008 Phunghrampi (Nargis Constitution tiah zong an auh mi) remhṭhan ding in zoh ṭhantu ding bu cu a hnatlakpi cang. A dikfel taktakmi Federal ramkomh kan serchuah ṭhan khawhnak ding ahcun 2008 Phunghram cu zoh ṭhan le remh hrimhrim a hau tiah Opposition a simi le Tlangcung mi hna nih aupi bikmi cu a si. Cubantuk, phunghram zohṭhan le remhthannak lawng in Kum 60 leng ramchung buaibainak hi a remh khawh lai tiah ruah a si. A fawinak in kan chim a si ahcun 60 lengkai buainak hi Phunghram Buainak (Constitutional Crisis) a si ti in chim khawh a si.

Kan Ramkomh Kawlram, a tulio cozah zong nih thlen a hau timi cu an theih tuk i, an duh tuk vemi pakhat zong a si. Asinain, zeitindah kan zohṭhan lai, remh lai i, hmai kan nawr lai timi tu ah hin Tlangcungmi pawl le a dang ralkah a simi (opposition) pawl ruah ning he a lam a dang deuh. Atulio cozah nih a duhnak ahcun Parliament chung in, Parliament nih remh timi hi a kalpi ning le a duh ning daan a si.

Cu he ralkah in, Tlangcung miphun hriamtlai phu tampi an i funtomnak bu a simi, United Nationalities Federal Council (UNFC) le ramkhel phu komh United Nationalities Alliance (UNA) hna nih cun 2008 Phunghrampi cu an duh lo, an pom kho lo. Annih nih an ti vemi cu, kan ram komh caah 2008 phunghram hi cu a si kho lo, a thar in ṭial ṭhan hrimhrim a hau an ti. Atu 2008 Phunghram hi cu, Zaukphung (Democracy) he a kalh tukmi phunghram a si. Cucaah, hi bantukin a ṭha lomi phunghrampi remh ṭhannak in cun a thar ser hi fawi deuh lai tiah an ti ve. Hi bantuk phunghram remh ṭhan ding hi cu a har tuk lai. A ruang cu, ningcang a zulh thliahmah lonak a tam tuk. 2008 Phunghrampi a rel balmi nih cun kan hmuh khawh cio dingmi thil a tam ngaingai.

2008 Phunghrampi a dirkamhtu le a duhtu a simi, Myanmar Peace Centre (MPC), President Thein Sein nih a dirhmi Ramkomh Kawlram Remdaihnak Phu nih cun phunghram a thar in ṭial ṭhan ding kong ahcun biatakte in a soisel ve hna. Phunghrampi a thar in ṭial ṭhan cu a ṭha tukmi a lo ko nain a taktak ahcun a sikho lomi thil a si tiah an ti ve. Laimi nih kan zohthlami le ngeihchun pakhat  a simi MPC rianṭuan Dr. Salai Ngun Cung Lian nih 7 Days Journal nih Phunghram kong biahalnak an ngeihnak ah hitin a ti “…. Mipi nih a thar in ṭial kan duh an ti ahcun mipi nih zeitluk in dah phunghram an lung a fian. Keimah hmuhnak ahcun mipi hi mah duhnak ah hman ding an si lo. Phunghram cu, hman hlanah remh an duh. Remh hlanah hlonh duh a si. Hman i a ngah lo ahcun remh ding, remh awk a ṭhat lo ahcun hnawmpung ah hlonh ding. Vawlei cung ah hnawmpung a phan mi phunghram a tampi….. tiah fiang phut in a chim. Hi bantuk ruahnak ruang ahhin pakhat le pakhat karlak ah i hmuh thiamlonak chuahter in tuk le dohnak zong a chuahter ṭhan khotu a si tiah MPC nih an hmuh ning cu a si.

Asinain, atu tiang ahcun Phunghrampi cu zeitindah kan remh lai, Parliament chung in maw kan remh lai, Parliament a leng in dah kan remh lai timi kong taktak in cun biatakte in ceihphainak a um rih lo. Parliament chung in remh ding ahcun a har ngaingai ding mi thil pakhat a si. Zeicah tiah Ramkomh Kawlram Parliament cu Zaukphung a lenlonak hmun pakhat a si ve rih. MPC nih an hmuh ve ning bantukin kan philh lo awk pakhat a si vemi cu, Zaukphung he a ralkah ngaimi 2008 Phunghrampi hramhram in tlangcungmi hna le a dang opposition phu pawl an pom/cohlan ternak hna zong nih a tuknak le dohnak a chuahter ṭhan khawh vemi a si ko.

Opposition Party a simi National League for Democracy (NLD) nih cun Parliament chung in 2008 Phunghrampi remh ding cu thilhar (Problematic) a si kha an hmuh ning cu a si. Naypyidaw i tuahmi World Economic Forum ah NLD hruaitu Daw Aung San Suu Kyi nih 2008 Phunghrampi cu Vawlei cung pumpi ah remh ding a har bikmi phunghram pakhat a si a ti.

2008 Phunghrampi zulh in, Phunghrampi remh ṭhan khawhnak ding ah Parliament chung ah zatuak 75 (%) nih duhnak thimfung le zatuak 50 (%) nih ram pumpi huap in duhnak thimfung a um hnu lawnglawng ah remh khawh ding a si. Ram pumpi huap in mipi nih duhnak le duhlonak hngalhnak caah ruahnak lak (Referendum) in Zatuak 50 nih lungtlin cu a har dingmi thil a si lem lai lo nain, Parliament chung in duhnak hmuh (pass) nak ding ahcun Ralkap nih an duh ve ṭung lo ahcun cucu a sikho lomi thil ṭhiamṭhiam a si. A ruang cu, Parliament chung ṭhutdan pawl cu Ralkap nih hnu lei in dirkamh mi Union Solidarity and Development Party (USDP) le Mipi nih thim lomi Ralkap Aiawhtu lawngte tam deuh nih an lak dih caah a si.

Cucaah, Phunhrampi remh han ding in timhtuah lio ah a biapi mi le a pakhtnak ah tuah ding a simi cu Constitutional amending procedure kha thlen hmasa dih an hau. Phunghram remh ding cu a dikfel taktak mi le hmailei ah tluangte in a kal thluahmah khomi le hmai a nor khomi Zaukphung a tlin taktik lawng ah tuah khawh a site hnga. Tahchunnak kan lak a si ahcun, phunghram remhnak kong ah a cung lei i kan langhter cangmi 75 (%) Parliament hnatlaknak le 50 (%) Ram pumpi huap hnatlaknak zawn ahkhan 51 % Parliament chung hnatlaknak le 75% Ram pumpi huap hnatlaknak ti’n hei remh khawh  a si hnga. Cu asiloah cun opposition party pawl nih 2015 General Election ah teinak an hmuhmi bawh ceo a hau hnga. Ruah ning bantukin teinak an hmuh a si ahcun Phunghram remh khawhnak nawl kha a tam deuh an ngeih lai i, Parliament chung in phunghram remh ṭhannak kha a fawi deuh hnga. Cu asilo ahcun, atulio Tlangcungmi pawl nih Phunghrampi \ial \hannak asiloah remh ṭhannak ah an aupi cuahmah mi Parliament leng ah Zaukhung ningte in remhnak tuahnak nih hlawh a tlinter bik lai tiah zumh a si.

A Voihnihnak Panglung (Pinlung) tonnak nih cun Parliament leng in ton biaruahnak cu aa ruah chanmi a si. Cu ton biaruahnak ahcun USDP, a tulio cozah tlaitu a simi lei in hruaitu upa hna, Ralkap hruaitu hna le Kawlram Bupi nih Zaukphung hmuh khawhnak ah a ṭuan cuahmah mi phu hna le Tlangcungmi hruaitu hna tlingte in an i tel lai. Cubantuk, Ram pumpi huap tonpumnak (National Convention) cu Mipi hna duh le duhlo meethlaknak (National Referendum) nih a zulh colh lai. Hihi A voihnihnak Panglung Tonpumnak tu hi atulio Parliament chungnak in cun a puitling deuhmi  le Zaukphung lei karhlang deuh mi  cu a si.

Zeibantuk thlennak lei ah Parliament chung in siseh, Parliament leng in siseh, ruahnak ṭha le thil ṭha hei um len ko hmanhseh atulio Cozah duhnak tello in cun a tlamtling kho bal lai lo. Atu Cozah zong nih Phunghram a remh mi a um ve ko cang. Cucu, 2012 by-election (caankar thimnak) ah NLD Party an ni tel khawhnak ding ah a remh mi Thimnak Phung (Election Law) a si.  Kan theih bantukin a tulio kan Parliament ṭhutnak ahcun USDP le Ralkap nih 75 (%) nak tam deuh an ngah caah a dang pawl caah cun cawl khawh a si lo.

Cun phunghram remhnak kong he pehtlai in, December 2, 2013 NLD Central Committee Cachuah ning in cun atulio Nawlngeihnak Tlaitu Cozah lei in Zaukphung lei i karhlannak le thlennak lei ahhin an hruai ning an nuarter deuhnak kha an langhter. A ruang cu, Aung San Suu Kyi nih President Thein Sein sin ah Acozah, Parliament le Ramkhel Party pawl nih remh a hau tiah an duh dihmi 2008 Phunghrampi kong he pehtlai in tonnak ngei ding in nawlnak cakuat kong bia an leh zokzok lonak ruang ah a si. Atu bantukin nawlnak ca an cohlan khawh colhlonak kong he pehtlai in NLD nih an duhnak an langhtermi ah remkhel party pakhat hnih lawng nih ceih awk a that lonak zia, remkhel party 58 le mipi vialte he aa pehtlaih zia kha an langhter. Hi bantukin NLD le Tlangcung mipawl nih an halmi tonpumnak nih cozah i duhnak kha dodal siloin a dirpinak tu a si deuh kan ram thlennak ah rian rang deuh in a kal khawhnak ding kha lung duh cu a si.

Kan nih Chin mipi zong nih A voi 2nak Chin National Conference biachah ning Kawlram Bupi Phunghram cu a thar ṭial ṭhan siloin a remh in remh ding in kan lung a tling. Asinain cu remh ding ahcun a um ciami 2008 phunghram kha parliament chung siloin parliament a leng lei in remh ding ti duhnak a si. {Cucu Extra Parliamentary Process ti a si i a cung lei ah kan rak langhter cang mi kha a si, cun Working Group for Ethnic Coordination (WGEC, hriamtlai bu 18 fonh) nih an duh ning zong a si fawn.} Asinain, cu phunghram remhnak kong he pehtlai in cun UNFC le UNA he cun an ruahnak a dang. Cun NLD zong nih cun phunghram a thar ṭial ṭhan siloin a remh in remh ṭhan ding an ti.

A donghnak ah, cozah nih phunhrampi remh ṭhannak ding, kan ram pumpi a daihnak le phukhat le phukhat daw le remte in kan um khawh ṭhan ding a duh taktak ko a si ahcun amah nih hnulo le tlailote in Phunghrampi thlen khawhnak nawl a tam deuh cu a ngeih taktak. Cucu ahohmanh nih al awk a ṭha lomi thil  a si. Asinain, anmah thazaang le bawmhnak peknak le lungtlinnak tello in phunghrampi remh itimh cu a si kho lomi thil ṭhiamṭhiam siko hmanhsehlaw, Phunghrampi a thar ṭial ṭhan cu kan ram deihnak le a ṭhancho chin khawhnak ding caah thil ṭha deuh le hlawhtlinter khawh deuhmi a phi cu a si ko lai tiah mi cheukhat nih cun an ruah ṭhiamṭhiam ve. Chinland Guardian nih Benedict Rogers biaruahnak an ngeihnak ah a timi cu, Ramkomh Kawlram ah a ṭha lei thlennak cu a um tak ko cang. Asinain, cu thlennak ah a dikfelmi le caan saupi a nguhmi thlennak taktak a si khawhnak ding caah cun, Phunghrampi remh ṭhannak le a dingomi phung le upadi pawl cu hrawh ṭhan hrimhrim an hau tiah a ti. Cucu, atu ah ahopoah nih duhmi le a herh tiah ruahmi cu a si ko. Sihmanhsehlaw, zeitindah Ramkomh Kawlram, 2008 Phunghram cu kan tuah lai? A thar in ṭial maw  a si lai? A um ciami remh dah asiloah parliament chung in maw? parliament leng in dah? timi cu a cung lei ah kan hmuh bantukin, bu khat le bu khat, pumpak le pumpak karlak ah lungkhatlonak a chuahpi kho mi biahalnak ngan taktak pakhat a si. Nang zeitindah na ruah ve?

Chirhchan:

> 2008 Myanmar Constitution

> Dr. Lian H Sakhong_The 2008 Constitution and Ethnic Issues: To What Extent Did It Satisfy the Aspirations of Various Ethnic Groups?

> Dr. Salai NCL le 7 Days Journal Tonbiaruahnak

> The Chinland Post, Vol. 1, No. 27_page 9

> Pon Nya Mon_ Amending Burma’s Constitution: Mission Impossible?

>Victor Biak Lian_The Second Chin National Conference

>The Hakha Post, Vol. 2, No. 59

> National Leguge for Democracy (NLD) Statemente_December 2, 2013

> Chinland Guardian_A change in Atmosphere, not yet a change in system: interview with Benedict Rogers

*** Hi Capar cu 04 December, 2013 ah ṭial cangmi a si.