Kan Thilhruk Zoh Than Hna Usih

Zarhpini zing cu pumh ding in cun Lai Christian Church (LCC) biakinn lei ahcun pumh ding in ka thawh. Pumhnak chungah cun pumhhruaitu pa nih church choir (hlaremh bu) nih hla an rem dih bak ah khin lunglawmhnak bia a chim- “Nihin zing cu Lai nu lawngte nan si, Nan hlaremh zong a tha, a dawh zong nan i dawh” a van ti. A peh rih mi cu kan hnu lei chung hrawng kha cu Korea an si rua a ti………

Kan chimtheu tawnmi “Mui le Sam” tihi kan theih cio theu lai ka zumh. A chim duhmi cu kan mui ahhin Sam hi zeitluk in dah a biapi mi a si kha a langhter duh mi a si. Kan sam hi kan lu ah a benh/bunh sawh mi a lo ko nain kan mui a cuan tertu thil lakah a bia pi taktak mi thil pakhat a si. Kan sam tuah/tan/tamh mawih daan nihhin kan lungthin sining a langter khawh ngai. Keimah ruahnak hna lebangah cun nu sam ker ning phundang deuh ka hmuh hna ahcun nu thalo deuh maw, asiloah nu phundang deuh ah ka hei ruah colh ko. Cun, pa pawl zong kan sam tan, tamh mawih ning hi a biapi tuk ve fawn. Kan sam tan daan nihhin kan sining kan hmurka in kan chim hlanah a langhter hmasa dih cang.

Cubantuk in “Fenh le Aih/Eih” zong hi a bia pi tuk mi a si. Kan thilhruk ningcang chinchin nih cun a hleice in a langhter khun. Thilhruk, fenheih ahhin chantiluan nih a kalpi mi a um peng. Kan thilhruk fenheih ning ka ti tikah hin kha chantiluan nih a kalpi mi kha ihruk, ifenh, ieih lo ding ka tinak a si lo. Asinain, chantiluan nih a kalpi mi chungah hin a ler deuhhlei, a hleihluat deuh mite a um theu tawn. Cun, thilhruk, fenheih kan titikah hin aa hruktu hi a biapi tuk. Cubantukin, kan ihruk hnawhchanh zong hi a biapituk fawn. Tahchunnak ah, Biakinn le Party kalnak thil cu a lawh ding a si hnga lo. Hibantuk thilhruk fenheihah hin pa pawl kan caah ahhin cun a dangtuk lem lo. A ruang cu formal le formal lo lawng in then deuh  a si. Asinain, nu pawl kan far le nan caah ahhin cun a dang ngaingai. Thilhruk ding phun a tam, sam tuahto ning phun nih a tlawm lo. Cu caah kan far le nih thil nan ihruk lai ahhin kan ruah piak u ti ka duh mi a um. Cucu, “Khawzeika Hmundah Ka Hruk Hnawh Chan A Si?” tihi  a si. Tahchunnak ah, Delhi laimi pawl kan umnak hmun hrawng um mi Kala pawl hna hi cu an khuate tuk tik ahhin an hmaika ah tamh hnawh awk le hot ngai le ler ngai in ihruk hnawh hi an tlak lem in ka hmu lo. Sarojini Nagar i thilcawk (shopping) ding na hei kal can i ler ngai le hot ngai nan ihruk ahcun a hei poi tuk hnga lo. A ruang cu, hawi nih an rak ihruk cio mite a si, hmun cangkang deuh zong a hei si ka ti.

Asinain, Zarhpi zing Biakinn kal na timh lai ahhin cun sau deuhte inkhua ruat ta law a tha hnga ka ti. Kan kalnak ding hmuhhi shopping mall le party tuahnak ding zong a si lo. Biakinn a si. Pathian thangthatnak ding hmun a si. Ka bia hramthok van char than ning law, “Nihin zing cu nan idawh dih, nan hlaremh zong a tha…..” Lai nu bak nan si. “Kan hnu lei zarh hrawng kha cu Korea mi an si rua…..” tiah pumhhruaitu pa nih a chim ka ti tik ah a chim duh mi cu Thilhruk le fenheih kha a si. Thatnak he chiatnak he Korea film nih hin a kan khuh ngai. Kawlram in India ram tiang zong kan irat pi peng. A that le that lo kha cu nangmahte in biakhiahnak rak tuah vete ko.

A chim rihmi cu, kan hnu zarh hrawng kha cu thawngtha chim zong rak ngeih khawh dawh a si rua lo. A mawh lo Khrihfa upa le Hlaremh bu hi hmai tonh in an thut caah a si. Hlaremh bu chung in skirt tawite mi tam nawn nih ihruk cang ahhin cun khua ruah ding tam dawh a si. Cu caah nu pawl nan thilhruk ning hi a that lem lo ahcun nangmah caah ral a si lawng siloin midang caah zongah sual phur tertu thil pakhat na si. Cu caah Biakinn chung fenheih ding cu phundang deuhte in chiah ah a tha.

Thil kan ihruk mi chung/cung ahhin a tial mi le a cuang mihi thate in zoh hna u sih. Keimah nih ka ton bal mi a um. A luancia mi kum tampi ka shirt angki ngeih chun, pumhnak ka hman tawnmi ah zeidah a cuang le zeidah a tial ti zong zoh lo in sau ngai ka hruk. Ka hawipa Tibet-Chinese pa nih cun Biakinn kalnak angki a ti. Voikhat cu sau nawnte in a zoh tik ah a hmuh mi cu biaknak thalo (Bad religion) tiah a tial i, Khrihfa hna nih kan iuar ngai mi vailam (Cross) kha arke in a kalh ko kha ka hmuh. Cucu biakinn ah cun, ihruk hrim lo ding kha a rak si ko. Cubantuk thiamthiam in “Nau ka pawi” (I’m Pregnant) ti a tial mi angki hna a hruk mi kan hmuh theu tawn. A dangdang zong tampi a um. Cu caah thil kan ihruk ifenh mihi zeibantuk dah a si? Zeidah a cuang? ti zong thate in zoh hna u sih.

Biadongnak ah, Kan thilhruk fenheih nih kan thinlung kan ruahnak, kan hmurka nih a chim hlan in a langhter. Cucaah fim khurte in fenheih izuam hna usih. A lertuk le a hleihluat tuk in um hna hlah u sih. Cun, khuazeika hmuh dah ka hruk chan a si tihi ruat hmasa hna usih tihi a tawinakte in van langhter ka duhmi  a si.

Salai SH Lian

10102011