Mitcaw Ka Hawipa Chuahni Lawmhnak Ah Ka Kal

Zaan suimilam 9:54 pm ah phone call ka ngah i Namkha (ka roommate) chawnh ka duh tiah mirang holh fiang ngai khin a ka ti. Namkha cu ka phone ka pek. An i chawnh tlawmpal ka ngeih cu Kala holh ah an holh an thlen. An i chawnh dih in hodah a si? Zeidah a si? tiah ka hawipa ka um timi cu ka hal. Ramnihal a si, tuzaan sumilam 12am ah amah umnak khaan ah ka chuahni lawmh ka tuah lai a ti i, nangmah le keimah zong a kan sawm ve tiah a hun vun ka chimh. Nan pahnih in nan rak ra hrimhrim lai a ti tiah ka hawipa nih cun a run nolh chap.

Kirori Mal College Hostel (D.U) ah hin Chuahni Lawmhnak (Birthday) tuah hi siangngakchia pakhat le pakhat i nuamhnak le lawmhpinak caah tuah lengmang a si. A sawng (hostel) i a ummi siangngakchia nih Rs. 10 asilo ah mah le sian zatcio thawh in a chuahni a simi hawi kha midang pawl nih lawmh piak a si lengmang ṭheu tawn. Cucu, zaan suimilam 12:00am ah khin leng ah chuah dih in tualrawn ah chuahni lawmhnak chang (Birthday Cake) cheunak, chuahni lawmnak na cung ah um ko seh ti’n hlasak tinak le chang eiṭinak in caan hman a si tawn. Asinain, atu zaan cu a dang. Kei le ka hawipa ka um ṭimi hi hawidang chuahni ahhin phaisa cu kan pek ve ko nain kan kal tuk lem lo. A tu zaan cu kalo ding ah kan sia a rem lo. Cuticun, suimilam 11:50pm ah Hostel Room No. ------ lei ah cun kan kal.

Ramnihal khaan ah cun kan phan. Innka cu kan kingh i akan on cu minung mitkhua a hmu ve lomi paruk le Subham (B.A Program Final Year) lawng an si. Keimah le ka hawipa kan phan i kan zaapi ah minung pakua kan si. Kanmah vial lawng cu a ra dang kan si. Kan luh cu Chuahni Lawmhnak Chang cung ah candle an rak tun lio pi a si. Mei an alhter i hmih ding ah cun chang cung i candle mei-alh termi hmai ah cun kan dir ter. Chuahni lawmhnak hla cu hawi phung in kan sa ve i, chang cung i candle van mi cu kan hmih ter. A hmih dih hnu ah Subham kan hawipa pakhat nih cun chang ahnak ah namte cu a kut ah a pek. Chang cu an pahnih bawm in an cheu. An pahnih bawmh cun pakhat hnu pakhat cu a kan tuh. Cudihcun, chang cu ka cheu i ka hei tuh ve. Cuticun, chang cu a ei na, a thuh na, a hmai ah a neh na in kan i tuai lulh ve. Ramnihal i mitcaw a hawi le dang cu an i nuam khim ngai ve ko. Keimah bel ka khuaruah a tam ngaingai.

Cu chang kan eidih cun kan zapi in hman kan I thla hna. Thate in hmanthlaknak lei I zohawk a theimi, a hngalmi hi minung pathum lawng kan si. Cuchung ah cun, pakhat nih hmanthlak a hauh caah pahnih lawng kan tang. Na lu chak lei ah mer, thlang lei ah mer, tibantuk khin kan i thla kho. Cu hman kan I thal dih cun, chuahni lawmhnak I hman dingmi Sprite a kik dinmi le aaloo chip cu Subham nih a hun chuahpi ṭhan. Cucu, kan zapi tein kan ding eiṭi ṭhan hna.

Mitcaw i chuahni lawmhnak ah cun ka voikhatnak ka tel a si. A hmuh zong ka hmu bal lo. Keimah pumpak i chuahni zong ka lawm ballo. Chuahni lawmh hrim hi ka hman lomi a si rua. Cu bantuk lak ah cun ka hawipa mitcaw Ramnihal nih cun khuazei zawn ah dah asiloah khuazei set ahdah candle an ka van piak i ka hmih lai, khawika ah dah chang ka cheu dingmi a um ti hngal na lo in a chuahni lawmhnak a tuah mi ka hmuh i keimah pumpak zong ka tel tikah hin ka ngeih zong a chia i thazaang zong tampi ka lak ṭhan.

Cucaah, nang le kei tah, kan tlamtlinlonak hi kan sontarh (a cawng piakchiat) a si peng sual maw? Kan tlamtlinlonak kha lungdonghnak ah hmang lo in hawi he kan i lawhlonak a si, kan i dannak a si ti in a tha bik in thazaang lak khawh i zuam hna u sih law pakhat cio kan caah ah a ṭha bik mi le san a tlaimi thil pakhat a si ko hnga.

Ka hawipa a mitcaw mi Ramnihal nih Delhi University sianginn a kainak ah zuamnak a ngeih ning le a kenkip lo in acozah rian luh khawhnak ding ah camipuai a dothlat khawh ning le a tuah khawh ning, nangmah le keimah bantukin Computer zong a hman ve ko ning, a nunnak caah zeihmah lungdonghnak a ngeih lo ning pawl hi khuaruah har a si ko. A caan ah cun a lung dongh caan zong a tampi ko lain ain a cung ah a tlung cang mi thil ah lungsak tein hmai a nor ngam ning, ralthatnak he kar a hlan ning hi ka caah thazaang pakhat a si ve caah hi capar tawi in nan sin ah ka run langhter ṭhan.

10112012

1:35am

++++