Nunnak tuanbia: nunnak hi zeitluk in dah man a ngeih?

Nikhat cu ngakchiapa nih a Pa kha a hei fuh i, Kapa…

Ka nunnak hi zeitluk in dah man a ngeih tiah a hal.  
A Pa nih cun lung tlang a pek i hitin a ti, Kafa
Na nunnak man hngalh na duh ahcun, hi lung hi i ken law, market ah va kal a ti.
Cun, mi pakhat khat nih a man an in hal si ahcun, bia ka khat hmanh let loin na kutdong pahnih lawng hei thlir tiah a Pa nih a ti.

A Pa nih a chimh bang, ngakchiapa nih cun market ahcun a kalpi.
Ngakchiapa cu market ahcun khuaruahhar ngai khin a chawk, cu lio ahcun ruah loin Pitarnu pakhat nih a hei kal hnawh i, Na lung cu zeizah in dah na zuar sian lai tiah a hal. 

A Pa nih chimh bang, ngakchiapa nih holh lo in a kutdong pahnih cu a thlir. Market i Pitarnu nih cun Fanghnih ($ 2) maw? Kan cawk lai tiah a ti.

Ngakchiapa cu a khuaruah har tuk i, a Pa sin ahcun a hei tli than.
Kapa, market ah tarnu he kan i tong.
Lung cu fanghnih in kan cawk lai tiah a ka ti tiah a hei chimh.

A Pa nih cun, zeidang chim loin, Kafa:
Na lung he hmun dang ah kan kalter than duhnak cu thilhlun chiahnak inn (museum) ah a si tiah a ti.

Tunai bang, minung pakhat khat nih a man an in hal si ahcun, ka khat hmanh lehlo in na kutdong pahnih lawng hei thlir tiah a pa nih a ti.

A Pa nih a chimh bang cun, ngakchiapa nih cun museum ahcun a kalpi.
Minute 20 tluk a hngah hnu khin, ngakchiapa cu upa nawn pakhat nih a hei fuh.
Na lung cu zeizah man dah a si? tiah hal.

Ngakchiapa nih holh loin a kutdong pahnih cu a thlir.
Upa nawn pakhat pa nih cun, $ 200 (Zahnih) maw? Ka lak lai tiah a ti.
Ngakchiapa cu lau ngai in a pa sin lei ah cun a hei tli than.
Kapa, kapa, Museum ah ka ton mi pa pakhat nih ka lung cu 200 in a duh tiah a chim.
Um, Ka fapa;

A donghnak bik na lung he kan kalter duhnak hmun cu lung mansung an zuarnak ah a si.
Na lung he lung mansung zuarnak dawr chung ah he lut law, mi pakhat khat nih a man an in hal ahcun, zeihmanh chim loin, na kutdong pahnih lawng hei thlir than tiah voidang kel bang a ti.

Ngakchiapa cu lung mansung zuarnak dawr lei ahcun, a hei tlikpi than.
Lung mansung dawr a hmuh i, a hei luhpi tik ah Putarpa pakhat kha a dawr chung a rak thu ko.

Cu Putarpa nih ngakchiapa put mi lung a hmuh tik ah, a hei tlik hnawh. Thangpi in a au!
Maw Pathian! Ka nunchung vialte ka rak kawl peng mi lung cu nangmah nih maw na rak ngeih.
Zeidah na duh? Zeizah dah na hau? Zei he dan thlen na duh lai tiah Putarpa nih cun a hal.

Ngakchiapa nih bia ka khat hmanh lehlo in, a kutdong pahnih lawng cu a thlir than.
Putarpa nih cun, $ 200,000 hmaw? Ka lak lai, kan cawk lai!

Ngakchiapa nih a zum kho lo i a Pa sin lei ahcun a kir zokzok than.
Kapa, kapa, Lung mansung zuarnak dawr i Putarpa nih $ 200,000 in kan cawk lai a ka ti.

Kafa, na hmu kolo maw?
Na nunnak zei tluk in dah man (value) a ngeih timi na fiang cang maw?
Nunnak ahhin, a biapi mi cu nangmah le nangmah khawizeika dah na chiah, khawika dah na um? timi hi a si. (Life is all about where you place yourself)

Nangmah nih bia na khiah khawhmi a si, fanghnih man lung maw si na duh?
Asilo ah, $ 200,000 man lung si dah na duh?

Mi cheukhat nih an in dawt i, anmah caah cun zei zong vialte na si.
Nain, mi cheukhat nih cun hmanrua menmen bang an in hman lai. Anmah bantuk caah cun zei man hmanh na ngei lai lo.

Cucaah, kafa zeipoah hi nangmah cung ah a hngat mi a si.
Na nunnak zei tluk dah man (value) a ngeih timi zong hi nangmah nih na khiah khawh mi a si.

 

Laknak: Dare to do.