Atulio Facebook le Instagram ah a lar ngaimi ’10 Year Challenge’ hi zeidah a si? A chuahpimi thatnak le chiatnak a um lai tiah na ruat maw? Tihphan awk tah a si lai tiah na ruat maw?
Social Media a hmangmi na si ahcun, atulio a lar ngaimi le hawi nih an tuah ciomi cu a luan ciami kum 10 hmanthlak le nihin dirhmun hmanthlak tarti a si. Cucu, ’10 Year Challenge’ tiah a hung lar ngaingai. Facebook, Instagram le Twitter a hmangmi pawl nih hlan lio le a tulio tiah an tar ciomi hmuh ding a tam ngaingai. Cucu, tulio ah online ah a lar bikmi pakhat a si tiah kan ti khawh.
Hi capar nih aa timhmi cu ’10 year challenge’ nih a chuahpi mi thatnak le chiatnak kong silo in, zeidah Facebook a tuahtu silo ah, hi bantuk thil tuahtu nih an i timhmi langhtertu a si. Hihi, a fiangmi cu ‘Facial Recognition’ timi atulio ah, phone, computer le a dangdang digital camera nih siseh, social media software nih mi mithmai fawite in a hliah khawhnak le tlaih khawhnak caah a si. Ruahawk a ummi bel cu kanmah pumpak sining, hmanthlak le data pawl zeihmanh fimmi ngei lo in, social media ah kan thlah dihmi hi a si.
Hmanthlak hlun kum 10 a luan ciami le atulio sining tar hi a poi lo tiah a ruatmi tampi nih an timi kan hmanthlak vialte cu Facebook le Online ah a um dih ko cuta tiah an ti. Data vialte Online chung ah a um dih ko cang. Facebook nih kan hmanthlak vialte a ngeih dih ko cang caah a poi lo tiah an timi cu a si.
A si, a hman! Facebook nih hmanthlak kan tarmi vialte a ngeih dih ko cang. Nain, zei ruang ah dah, Facebook ah atu bantuk hmanthlak tar ding hi ruahnak a chuah i, mi tampi tuah ding in a forhfial. Atulio hmanthlak le a luan ciami kum 10 hmanthlak tar hi a hrihawh? A hlan lio i tarmi cu a kum le caan he tha tein Facebook nih record a tuah dihmi a si ko. Thinphan awk a um lo dingmi a si ko ahcun, ziah Facebook nih a tuhnu pi ahhin, a hun larter, a tuahter than.
A ruang vun zoh tuah hna u sih;
Tha tein hun ruat hmanh u sih; ‘Facial Recognition’ timi Seh nih mi mithmai hi a chingchiah khawhnak ding caah hin ‘algorithm’ hneksak an duhmi a si. Cucu, a felfaimi a chuah i zumhtlak a si khawhnak ding ahcun, mitampi sining kha an theih khawh a hau. Cucu, minung pakhat hi kum 10 a rauh hnu ah a mui zeitluk dah a thlen timi theih duh ahcun, minung tampi an i tel a hau. Cucaah, pumpak pakhat nih amah lungtho tein a tuah lawnglawng ah ‘Facebook, Computer le Seh’ lei nih an thiamnak an hneksakmi cu tlamtling ding a si hnga. Cu ruang ah atulio ah, a hun lar ngaingai mi a si i, kan nih a hmangtu pawl nih zeihmanh ruahlo in kan tar sawhsawhmi hi ruah ngai cu a hau hnga.
Cucu, minung kan sining ah, fialmi thil poahpoah hi a tuah kan i harh ngai. Kan huam tawn lo! Cucaah, lungtho tein tuah ding ah #10YearChallenge tiah an hun larter ngainak hi a si. Nain, Facebook a tuahtu le riantuantu pakhat sinak ah, kanmah nih kan tuahmi a si lo. Facial Recognition ‘computer nih mi mithmai’ a hngalh khawhnak a tuahtu pawl nih anmah ‘App’ hmang in an tuahmi a si. Cucaah, Facebook nih cun, ‘Facial Recognition’ cu mah tein phih khawh le on than ding ah kan chiahmi a si ko.
Hihi a thawknak taktak cu Amazon nih a tak in ‘real-time facial recognition’ hi 2016 in a thawk hnu ah a chuakmi a si. Cucaah, hihi Online kan hmannak ah thinphan dingmi le ralrin dingmi a si maw? Kan hmanthlak pahnih kum 10 a luan ciami kan tar tinak nih zeidah a chuahpi lai? A fawinak in cun, thinphan awk cu a um men hnga lo.
Nain, nihin thil sining zoh tik Minung hi a tak vawlei lawng silo in Digital World (online le chanthar seh thilri hmannak vawlei) he then awk tha tilomi dirhmun ah kan phan. Kanmah minung sining hmang in seh thilri hmanmi fimthiamnak a thancho chin khawhnak ding caah an i zuam cuahmahmi a si. A fawinak in, vawlei cung mirum pipi nih zapi zaran sining hmang in anmah thawnnak le rumchinnak hnga tu ah an kan hmanmi a si tiah thiamsang nih an ti. Anmah an hmuhmi hlawk chinchin nak tu a si ko.
Cucaah, kan ruah dingmi le hal dingmi tu cu mirum pawl nih kan sining, chuahnithla, umnak, tbk. ‘data’ an duhpoah i an hmanmitu hi fak deuh in ruah ding a si. Kan data hi tha tein an kan upat piak ding a si.
Cu vialte nak in a biapi deuhmi cu, Kanmah pumpak (social media hmangtu) hrimhrim nih kan sining ‘data’ hi kan upat ding a si. A fiangmi cu, kanmah hrimhrim nih Online ah kan sining hi kan zuar dih le phozar dih ding a si hrimhrim lo!
Ch: Kate O’Neil nih ‘Facebook’s ’10 Year Challenge’ Is Just a Harmless Meme—Right?’ timi capar a tialmi cherhchan in tialmi a si.
No comments:
Post a Comment