Ramkhel Kong Ah Catialtu Le Careltu Kar Ralrin le Ruah Dingmi; Zei Lam Na Zulh Lai?

Catialtu; Salai SH Lian

Atu lio caan hi Ramkomh Kawlram chung ah ramkhel kongkau catial a linhsat lio caan a si bantukin catialtu pumpak zong nih ralrin a herh lio caan a si. A reltu lila zong nih a rel thiam a herh ngai caan a si fawn! Relmi kha mah rawlrialnak tein rial a herh caan a si. Zeidang cu chim lo, Laica tial karlak koko hmanh ah a hung linsa ngaingai. A bik in Online ko ahhin a zualhma khun; ramleng a ummi deuh nih hman khawhmi a si ko nain daithlanh dih awk cu a tha lo! A ruang cu, atulio Online/Social Media ah ceihphaimi le tialmi pawl nihhin, ram chung ah zeihmanh santlaihnak (impact) a ngei lai lo ti awk a tha hrimhrim lo. Ram chung lei laihlum nih a tial lei in an ti khawh lo hmanh ah, relnak ahhin cun thil le ri ngeihmi nih a hun pek deuh ngaingai cang. Ram thlennak tlawmte a hung umnak nih a thlenpi ngaingaimi cu Technology lei; a bik in [Mobile Industry] hi a tel ve tiah ti khawh a si. Cucaah, mi tam deuh nih, Smart Phone an hmang i, Hakha ahcun, Internet Dawr tuah zong a tlamtling le hlawhtling lo deuh ngaingai cang. Cu nih a langhter mi cu kutput pehtlaihnak nih santlaihnak a hung ngei tinak a si. Cucu, 2010 le 2012 Thimnak nih a chuahpi mi lak ah vun rel awktlak ah ruah khawhmi thanchonak kan ti lai maw, thlennak dah kan ti hnga? Atutan, 2015 Thimnak nih tah zeidah a hung chuahpi lai, a khirh lai maw? hmai aa nawr lai dah timi cuanh chung awk kan hun ngei. Nain, atutan ka vun tial duhmi cu a thimnak nih a chuahpi mi kong ah siloin, cucu thimnak i ramkhel (politics of election) kongkau capar, hmuhning kan tial tik ah zeidah ruah chih a herh timi tuhi kaa timhmi a si.

Cucu, catialtu nih Website le Blog, Journal, tbk. ah careltu an um sawh nakding ah le an kau sawh nakding ahhin ruahnak le hmuhning kha a sining lopi in tial lo ah a tha. Catialtu ti tik ah, a biapi khunmi cu Media, News, tbk., in sutung (institution) bang a ummi nih ralrin ding ah a biapi khun. Pumpak catialtu zong nih ralrin ahcun a tha! Catialtu pakhat si tikah, careltu a tlawm le tam cu ngeih a si. Pumpak catialtu nih cun, ahodah a tanh, a hodah a bomh timi a langhter khawh ko hnga. Cun, Party chungtel, party minung, party nih fial in tialter mi nih cun a tial ko hnga! Asinain, cucu hodah a bawmhmi si timi langhternak caah thil diklomi kha a hman a si ahcun a palhmi a si thiam. Cucaah, cu a palhmi nih careltu a sining loin an pialpi ahcun cucu a poi hringhran! Ruahnak le Hmuhning cu duhning poah in tial khawh a si ko. Nain, a fekfuanmi a ruang le sinak cu a ngeih in a tel chih a hau. Cucaah, atulio Ramkhel kong ah mah duhning poah in tial awk a tha hnga maw? A ruang cu Phunghrampi le a dang phungphai an um. Ramkhel kong le sining kong chim ahcun, Phunghrampi le a pehtlaimi phungphai zong zoh chih a hau. Phunghram zong chih lo le rel lo i, Ramkhel kong le Thimnak kongkau ah hmuhning le ruahning (opinion) tial i timh cu, hrial ah a tha!

Nain, pumpak in catialtu cu pumpak pei an si fom cu an duhning paoh in an tial khawh ko hnga. Asilo ah, Ramkhel phu caah aupiaktu, chimrel piaktu si ahcun, anmah phu nih an duh ning tein a tial ko hnga. Asinain, midang phu soisel le chimrel thatlo cu a ngah hlei lo. Atulio vawlei ah, cozah tang, ramkhel phu tang, chawletbu tang tbk. in a ummi Media an um liangluang ko. Asinain, Media, News Agency, Journal, tbk. nih cun kaptanh ngei in maw a silo ah, pumpak ruahnak kha a phu hmang in tial awk a tha hnga lo. Cucaah, a si khawh chung in kaptanh le tanhhlei ngeilo in catial le a palhmi thawng, thil sining mipi careltu sin ah ningcanglo in pek hrimhrim lo a biapi tuk. Media cheukhat cu ramkhel phu maw silo ah, pakhat khat i a tang ah a um ding a si lo, cucu hngalh cia dihmi a si ko. Cun, thawnglatu hna zong nih anmah pumpak dirhmun kha a phu hmang in langhternak an tuah ding a si lo. Dirhmun fek ngeih ah a herh! An dirhmun zong kha hawi bantukin an duhning poah in langhter, chimrel awk a tha lo. A rau rihlomi ah, MMTimes (Sept. 16) nih U Myint Kyaw (Interim Myanmar Press Council Chungtel) biaruahnak an tuahnak ah a chimmi cu; Thawnglatu cheukhat cu an rian an i fianglo- Journalist maw kan si timi le Activist deuh dah timi kar ah an um. Tahchunnak pakhat a pekmi cu Thawnglatu cheukhat nih Facebook ah zei Ramkhel Phu (Political Party) dah an tanh i, zei ah dah an thimfung an thlak lai timi an langhter. Cucu, an tuah ding rian a si lo. Thawnglatu nih a  tuah dingmi a rian cu a dikfelmi thawngpang mizapi sin ah pek kha a si. Cucu Thawnglatu nih thawngpang a pekmi hrambunh cun thimnak ni ah MIPI thimfung thlatu nih biakhiahnak an tuah ding a si.

A dang tahchunhnak pakhat in hun char ninglaw, nai ah Website pakhat (mizzima?) ah ramkhel phu maw zoh in kan thim lai? A minung zoh in dah timi catialtu nih a tial i fiangphut in, a tial caah website (media) nih catialtu min langhter in amah pumpak ruahnak a sinak kha an langhter chih. Cun, a dang pakhat cu, Laimi thawngpang website ah Party Hruaitu lawng Chief Minister an si kho tiah a tial. Palh cu minung phung a si ko nain, hihi cu palh vialte lakah palh bak a si. Khoika phung le phai dah chirchanh in cucu a tial ning a si tikha careltu nih kherhlainak tuah a si lo tik ahcun, ruahnak a then i a buai, lung vaivuan in careltu an um. Cun, careltu mipi vialte a palhmi le diklomi a relter hna a si ko. Cucu catialtu zong nih phunghrampi mahka zawnte chirhchan in tiah tial chih ding a si hnga nain..... a ti fawn lo! Chief Minister tuan khawhnak ding ah Party Lutlai si a hau hrimhrim tiah Kawlram Phunghrampi ah a tial lo. Cucu, khua tuaktaan lo in catial zong a si. Party President lawng nih Chief Minister a si khawh ding a si ahcun, zeitindah NLD, NUP, USDP, tbk. Mainstream Party pawl nih Chin Ramkulh le ramkulh dang tbk. ah zeitindah an tuan lai? Cun, Party pawl an ngeihmi Phungphai (pawlisi- Policy) hngalh a herh. USDP an si ah, NLD an si ah, NUP le Chin Party in CNDP, CPP, CLD, ZCD, an tampi rih cu mu; Kawlram le tlangcungmi dihlak huap in kan hngalh dih lo nain Chin Party le Kawl Party ngan pawl nih an pawlisi le hruaining ah Chairman/President lawng Chief Minister a si lai. President a si lai tiah an sermi an um lo. Khua ruah a hau; Lai thluak in tuak khawhmi a si. Cucu ruahnak ding caah, Political Science cawn zong a hau lo. 

Cucaah, catialtu nih a palh zong ah careltu nih mah rawlrialnak tein rial a herh. Rawl khailo in kan dolh lo bantukin, atu ka khaimi hi zeidah a si; dolh awk a tha maw timi le Dolh ding le Dolh lo ding thleidan thiam a herh ve. Cu nakin a biapi deuhmi cu catialtu nih a dikfelmi, rianchanh tlakmi, palhlomi in tial hi a si; cun ah a tha i a herh fawn. A donghnak ah philhlo ding a biapi mi cu; Zalongte Chimrelnak Nawl kha Tuanvolaknak le, Mawhphurhnak nih a zulh chih timi hi a si.

Theiternak; Hihi capar nih pumpak in tialmi a si caah, Catialtu pumpak nih mawhphurhnak a ngeih.

Sept. 19, 2015   

Pehtlaimi capar rel ding; 
2015 Kawlram Thimnak Ah Nuhrin Covo Tahfung In Zohnak
2015 Thimnak Caah Chin Party Khuakhan An Palh Maw, An Tuah Hram Dah?
2015 Ah Mi Zeidah Na Thim Lai