July 7; Ramkomh Kawlram Ah Sianghleirun Siangngakchia Thisen A Luan Ni

July 7, 2015 Nihin hi, kumzabu a cheutluk a luan cangmi July 7, 1962 ah Rangoon University ah fimthiamnak a cawng liomi siangngakchia hna cu Ne Win cozah nih hramhram in meithal bak in University Campus chung ah a rak kah [Open Fire] hna Ni a si. Cucu philhlonak ah capar tawi ka hun tial.

General Ne Win hi, a ngaingai tiah cun, Sianghleirun zong a rak kai balmi a si lo i, Sianghleirun Siangngakchia hi a rak huat hna, a rak tih hna. 2 March 1962 ah General Ne Win hruaimi ralkap nih nawlngeihnak hramhram in an rak lak [Aana-ting or Coup d'etat]. Ne Win nih nawlngeihnak a lak hnu in RU ah buaibainak a thok colh. May 11 ah, Rangoon University Sianguk (Rector) cu Ne Win cozah nih an uktuk [pressure] ruang ah sianguk sinak in a chuak. University Council hruai ningcang zong an thlen. Council chung ah Ralkap minung an hun telh hna. RU cu Ralkap nih direct uk khawh ding ah an hun tuah. Cuticun, Ralkap nih cu an duhning poah in, University hruai ningcang vialte an thlen dih i nawlngeihnak cu an tling lak in an i lak.

Cu bantuk a zalenlomi phungphai le ralkap uknak tang ah Rangoon University an phanh tik ah, Siangnakchia nih July 7 ahhin an lungtlinlonak le duhlonak kongkau ceihphai ding ah Rangoon University Students' Union Innpi [Building] hmai ah rak chuak in tonpumhnak an ngei. Ralkap nih Siangngakchia hruaitu upa deuh tamlakte an rak tlaih hna.

Zaanlei 5:30 pm hrawng ah Ralkap mawtaw pahnih in meithal he siangngakchia duhlonak langhtermi lehrulh ding ah Mandalay Hall, Ramanya Hall le Chancellor Road ah an hung phan. Ralkap nih a rak lehrulh ningcang cu tha tein biaruahnak ngeihpi si hrimhrim loin, Sa le Ral bantukin siangnakchia cacawng liomi cu meithal [automatic rifles] in a rak lehrulh hna.

Siangnakchia minung pazeizah dah an thi timi hi a dikfelte in hngalh khawhmi a um lo. Ralkap nih an chim ning le midang chimmi a rak i khat lo. Ralkap nih cun, siangnakchia 17 lawng an thi tiah a rak thanh. Nain, Mandalay Hall lawnglawng ahhin, siangngakchia 17 leng le a dang siangngakchia za renglo an rak thi. Cucu, JULY 7, Nihin bantuk ah hin a rak cangmi a si. Kum 50 fai a rau cang. Atu ahhin, a nungmi a tampi an um ko rih. An awka ngaih in hal khawh an si. Kanmah Chinmi nih kan bochanmi Dr. Bawi Hu zong a rak i telmi a si [Amah chimnak in ka theihmi tampi a um i, amah a tel tiah ka ruah—ka palh kho].

Cun, a thaizing July 8, 1962 zingka sml. 6 ah tuanbia ah min a ngeimi le a langsar mi Rangoon University Students' Union Building [Innpi] cu bom in Ralkap nih an rak puah.

Cuticun, Ralkap cozah tang ah kum caan saupi ‘ni-zan-tih-ni’ taktakte tiang kan hung um. Kumzabu a cheu fai hramhram in a kan uk. A kan pen. Atu zong kan um khan a si rih ko. Ralkap cozah tang ahcun, Mirang hmanh rak doh kho ding tiang in mino a hringsortu sianghleirun tha cu hrawh hram an hun thok. Sianghleirun siangngakchia pawl cu khua kiken ah chiah an hung si, nihin Thein Sein Cozah tiang zong ah, Sianghleirun cu khuachung an hung lut kho ti lo. Khualeng ah an i benh dih. Cucu, Siangnakchia nih kan buai kho hna hlahseh tiah Ralkap nih an rak i timhtuahmi kha a si.

Mizapi cawn khawhnak sianginn cu vawilei cung siang cacawn ning chiakha bik ah an thlen ko lio ah, anmah Ralkap Sianginn [Military Academy] cu a that khawh chung tha in an tuah. Ralkap cu ramleng sianginn thatha ah an rak thlah hna. Mizapi pakhat hmanh cawlcangh khawhnak le fimthiamnak ding a lam vialte an rak phih dih. Nihin ah a thleng cang tiah ruah a si ko nain, zei ngaingai dah a thleng. Siangngakchia a lehrulh hna ning zoh tik ah, lungnuamhlo awk ngaingai a si ko rih. Fimcawnnak phungphai remh ding ah nawlhalnak tuahmi Siangngakchia hruaitu an tuk, an velh, an hrem hna hnu ah, thong an thlak thiamthiam hna. Zeidah an i thlennak cu a si kun? Ka peh lengmang cun a sau tuk sual lai…

Nihin July 7, Rangoon University ah a rak cangmi Massacre [thahnak] hun hngalh thannak le philhlonak caah tiah hi capar tawi in kan hrawm hna.

Ref. 
1.      Dr. Bawi Hu biachimmi [Ka diary]
2.      Kanbawza Win [a university student who survived July 7, 1962 Massacre] Youtube Biachimmi
3.      1962 Rangoon University Protests [wiki]

Salai SH Lian

July 7, 2015