Zarhkhat Chung Thil Cangmi Kong Ah Ka Hmuh Ning Tete

Demonstration (Sandahpiah) Kong!!!

~“Demonstration(သပိတ္ေမွာက္/ Sandahpiah)” ahhin, Democracy he a kalh taktak mi thil pakhat a um tiah an ti.~ Cucu, minung pakhat-hnih hrawnglawng nih biachimnak Loud Speaker/Microphone tlaih in bia an chim. Minung pakhat-pahnih nih an control, an uk. Cu minung cu zapi lungtlinnak in thimmi an si maw silo timi cu kan hngalh dihmi a si. Zeipoah hi ruah deuh awk lawngte an si ko —

+++++

Aiawh le Aiawh Lo Kong!!!

Atulio, Thein Sein Cozah, Thein Sein a miṭhi le milang pawl nih Rampi Fimcawnnak Phung (National Education Law) kong chantiluan he a tlak lo, zaukphung muru a kheng loh, kan duh loh, tiah Duhlonak Langhtermi (Sandahpiahmi) Sianghngakchia hruaitu pawl kha hiti hin bia an hal hna ti a si.

"Zeitindah nanmah rual hi Ram Pumpi Siangngakchia Aiawhtu kan si nan i ti khawh ning? Nan aiawh maw?" tiah an hal hna.

Ruahawk: "Anmah Thein Sein Cozah, Thein Sein a miṭhi le milang pawl nihhin tah Rampi Ukning le Cozah Kalning cang ah zeitluk in dah an Aiawh ve hnga???

Nang Zeitindah na ruah ve? Cucu, Mah hngal lo ti cu a si kolo maw?

+++++

Burma le Myanmar Kong!!!

Mahi Min (Burma/Myanmar) auhnak kong ahhin, Political Reason a um. BBC ramleng media, Irrawaddy ramchung (media) etc. tampi tel in, Burma timi hi tam deuh nih an (rak) hman na hmuh lai. An catialnak ah (Myanmar) tiah an thlen cu naite 2010 hnu lawnglawng ah a si i Myanmar timi biafang hi Media le Ram tampi pehtlaihnak ca ah an hmanmi a hramthok na hmuh lai. Burma le Myanmar hmannak kong ah, a khatmi a si ko (Kawl veve a sawh duhmi a si ko). Nain, zeiruang ah dah, Burma kha saupi an rak hman duh deuh tiah cun, Kawlram Bupi fonh/komh tiah kan tilengmang mi Union of Burma cu Panlong (Pinlung) hnatlaknak in a rak chuakmi ram a si. Mah hlan ah Union of Burma timi ram a rak um ballo. British Burma or Proper Burma tiah an rak ti (Siangpahrang chan kha cu a dang)...Burma in Myanmar timi biafang an thlen cu, 1989 kum ah a si (Na chuah hlan deuh ah kan ti lai cu). Cucu, Official in zeihmanh lunglaknak (Referendum) um lo in, Ralkap Cozah nih International ah Political Legitimacy ngah nak ding ah an mah nawl in an rak thlen mi a si. Cucu, ram tampi, ramkhel riantuan mi, media nih an rak cohlang lo. Nain, tlawmpal ah UNO nih a cohlan piak. Atu tiang ah Ramkhel Upa tampi siseh, Media, Ram le Ram Pehtlaihnak, hlun a ngei ciami ram tampi nih Myanmar timi biafang hi an cohlang duh lo. Atu zong ah ramtampi nih Union of Burma/Myanmar cu Burma tiah an kawh rih. Myanmar tiah 2010 or 2012 hnu in kawh hram a thokmi ram pawl nih an kawhnak a ruang cu, 2010 thlennak kha Kan in Cohlan (Political Recognition le Legitimacy) kan in pek tinak caah a si. A tawite in ka tial lai ka ti nain a tial thiam lo.. peh rih ka duh nain a sau tuk cang hehe.... Cucaah, ca an tial tik ah politics a tel i, a sawh duhmi a um tikha a tawinak te in ka hun in hrawmh duh ve, siaherhnak he,

++++

Vailamtung Kong Ah Cabinet Biachahnak!!!

Nizaan [Jan. 28, 2015] Chin State Cabinet Meeting Biachahnak cu, Laitlang (Chin Ramkulh) ah hmailei caah buainak ready tein va chiah chia he a lo kolo maw? Vailamtung phur lo ding timi menmen ah khan i lawm awk a tha lo. Vailamtung pawng ah Pura saknak nawl pek ve ding ti a si..... Si ahcun Pura an saknak pawng vialte ah Pura tia-tia in, Vailamtung phunnak nawl an kan pek ve lai maw (Vailamtung hi ka duh tuk ruang ah a si lo, a chung i tlukruannak (equality) a um lomi kha ka chim duhmi a si.)? Hihi biakhiahnak in anmah le anmah an i hreng ve thiamthiam ko. Atu pawl Term a dih lai, hmailei ah zeitindah timi kha ruah chih a hau! Laimi (Chin) nih anmah biakhiahnak te hi hriam hmang in an lehnak hna lai lo ti awk a tha lo. An biachahnak cu Meitil hmete in meikau tak he a khat kolo maw?

+++++

Kawlram Fimcawnnak A Rawhnak Cu???

Kawlram Fimthiamnak lei Thiamhleisang (Educational Experts) pawl nih Fimnak le Thiamnak (Intellect/education) timi hi an hngal taktak maw? An thei taktak maw? ti hal ahcun, "No" thei hlah ti a si ko lai.

Ziah? Tuanbia (History) nih a chim....

1960s hrawng ah Lung (Rock) lei thiamhleisang (geologist) kha Ram pumpi Fimthiamnak lei lutlai ah rian an rak pek tik ah, a mah nih a thiam bikmi Lunghak bantuk ah a cang ko. Kawlram Fimthiamnak vialte a rawk dih! Rem awk tha ti lo ding deng tiang in hak dih lak in a chiah.

Zalonnak hmuh thokka in 1950s, 1960s hrawnghrang i, Asia (Nichuah) Ram ah Sianginn tha bik, hopoah nih fimthiamnak cawn ding ah an rak i timh dihnak hmun, an rak duh dihmi hmun pakhat cu Rangoon University hi a rak si. Cucu, tuanbia (history) nih a chimmi a si.

Rangoon University

Nain, Ne Win Ralkap uknak tang ah, 7 July 1963 hnu Geologist (Lung thiamsang) Dr. Nyi Nyi kha Ralkap Cozah (Revolutionary Council) fimthiamnak lei ruahnak petu ding ah an rak hman. A ruang cu, a min rak thangmi le thate in a rak kal cuahmah mi sianghleirun kha control khawh dingmi a si khawhnak ding caah thil thar le ruahnak thar chuah ding ah an rak hman duhmi a si.

1947 lio i, University Students' Union i President Saya Dr. Than Tun (Tleicia) tuanbia lei thiamsang (historian) nih cun, serhsat biaeng in Ka upa Dr. Nyi Nyi, nangmah na riante hi na tuah ding le tuan ding a si ko. Nangmah na rian a simi, Lung le leitang chuak thil kong ah khan va buai deuh ko, hi bantuk fimthiamnak (education/intellectual) kong ah in rak i thlak hlah tiah a rak ti bal ti a si tiah Dr. Maung Zarni nih a tial.

Cun, atu ah, Dr. Nyi Nyi i a siangngakchia lung thiamsang a dang pakhat Dr. Yin Yin Nwe cu atu ah Fimthiamnak phungphai sernak lei ah a hun i tel than. A tel sawhsawh lawng hmanh si lo in, National Education Committee ah lutlai a si. Fimthiamnak (education) lei ah President ruahnak petu a hung si than hoi.

Cu ti a si tik ah zeitindah Kawlram Fimthiamnak cu a rawk in a tlak lai lo i, A rawh ding hrimhrim a si ko. Lung thiamsang (Rock specialist) nih cu bantuk dirhmun a lak tik ahcun a zual hma ko lai hen ta ti lo awk a tha lo. Nain, atu belte tu cu hrawh chap awk a um tuk ti lo ti khan khi a si.

Cu hnu ah, Ralkap cozah a hung kai than, Ralkap zeihmanh thiamnak a ngei lo hrimhrim mi Raltuk le Mikah lawng silole rampi le minung humhimnak riantuan ding a siko mi nih, cu bantuk a herhmi le biapi mi hmun hma cu an hun lak than hoi ai! Cu tik ah, a rawk chinchin. A rawk dih cikcek khan khi a si.

A ngaingai ti ahcun, Fimthiamnak Sang (Higher Education) cu hrawk chap awk ngaingai zong a um men ti lai lo. Ralkap cozah le New Win Cozah nih hrawh ding vialte cu an hrawh dih ko cang.
A tulio thil fimthiamnak lei sining he ahchunnak in vun zoh hmanh hna u sih.

"Kawlram ah a si duh lo ngaimi pakhat cu, keimah ka cawnmi Architecture hi ramdang Colombia University hna ah cun, Art & Science tang ah an chiahmi a si i, Bachelor of Arts in Architecture (BA); Bachelor of Science in Architecture (BS) tiah degree an pekmi a si. Kanmah zong BA Arch tiah degree an kan pek ko mi cu an thlen than hoi i, Technology tang ah an chiah i, Engineering Degree an pek. Engineer hrim kan si lo mi tiah nizaan ah Chulalongkorn University kailio mi" UCuai nih a ka ti ve hoi.

Cutik ah, minung pakhat nih a rian a silomi Uknak duh ruang menmen ah rawh lei lawnglawng a phanh ko. A thatnak le thancho duhnak in aa tellomi ah cun, Fimthiamnak cu thancho lei panh lo in tumh chuk lei lawngte a zaal ko. Kumpi kum 60 hrawng a rawh cang tik ah, hawi hnu ah kan tang hringhran ko cang. Kan i remh a hau ko tiah, atu ah sianghleirun siangnakchia nih an au pi cuahmah mi hi a si ko.

A hren lawngte in an hren tik ah Academic Freedom zong a um ko lo. Zaukphung he a tlakmi, Democratic Education system zong a si lo. Central nih a tlaihmi fimthiamnak phung a si tik ah, mahte khuakhannak zeihmanh a um kho lo. Cucaah, chan he a tlakmi fimthiamnak cawnnak lei ah karhlan than ding cu a cu ko cang tiah Siangngakchia pawl an aumi hi a si ko lai dah. An au ding a si ko ka hei ti ve.

Zeitik khin dah, Asia (nichuah) ram nih an rak uar tukmi Sianginn tha cu amah dirhmun ah a phanh than khawhte lai timi cu ruah lo awk thalomi thil pakhat a si.

Salai SH Lian
01022015

++++++

Note: Hmanthlak pawl hi internet chung ah a remnak poah ah lakmi a si. Cun, Edit tuahlo bak a si. A fawinak in, Geologist kha Lung le Leitang chuah thiamhleisang an si lai nain, Lung ka ti top. Ka theithiam hram te u~SHL