Muslim Thiamhleisang Nih Islamic State (ISIS) Dirpitu Phu Sinah Zuahcawhnak Ca (Open Letter) An Chuah; ISIS cu mi zeibantuk dah an si?

Hmanthlak; ISIS Ralhrang

Ramkip fonh in Muslim thiamhleisang (Scholar) minung 120 leng nih Islamic State (ISIS) dirpitu phu ralhrang le zultu pawl sinah Islam zumhnak a Muru an hngalh tak le taklo kong ah zuamcawhnak cakuat (open letter) an chuah i an cawlcangh ning zoh ah Islam zumhnak a dirpitu siloin Islam zumhnak he a kalhmi an si deuh tiah an duhlonak kong an chim.

Islam zumhnak a hrampi a simi Qu'ran zohchih in chuahmi cahmai 18 cu cawn nithumni (Sept.24) ah khan kan chuah. Hi ca an chuahnak a ruang cu Iraq le Syria cu Islamic State ah kan ser lai tiin a tangmi ralhrang le zultu phu hna nih an minung an thah, hrem le tuahto mi ruang ah a si. Mirangca zong in leh a si cang. Atu bantuk ca kan chuah hi American pawl ca hmanh ah khua ruahhar a si men lai tiah Washington ah thanhnak (release) an tuahnak ah Council of American-Islamic Relations i Executive Director Nihad Awad nih a chim.

"Zuamcawhnak Cakuat (open letter) kan chuahmi cu Arabic ca in a si. Hi ca hi ruahnak a kaumi le thilthar a cohlang khomi hna caah cun a si lo. ISIS tiah a cawlcangmi ralhrang le zultu pawl hna nih Islam zumhnak a hmanlo ning in a kalpi mi hna caah a si. Muslim cheukhat nih cun a fian zong an iharh ngai kho men."

"Hi catialtu ah Muslim vawlei ah minthang Sheikh Shawqi Allam, Sheikh Muhammad Ahmad

Muslim Scholars pawl nih Open Letter kong ah thawngfianhnak an tuah lio

Hussein le Jerusalem and Palestine in thiamsang tampi an i tel. Ca chung ah ISIS pawl nih Islam biaknak he kalh in sualnak an tuahmi cu pakhat-hnu-pakhat in kau deuh in a hmanlonak langhter a si" tiah Awad nih cun a chim.

Atu lawng hi Muslim hruaitu hna nih hmunkhat ah ran in duhlonak kan langhter le an hmanlonak kan chim a si lo. Germany in Central Council of Muslim hruaitu Aiman Mazyek nih a chimmi cu kan hnu zarh zong ah Muslim ram vialte nih Islamic State dirhnak caah a tangmi ralhrang le mithat lainawng hna an hmanlonak hi vawleipi theih in kan chimrel le kan aukhuan a herh cang tiah kan hliphlau hna ko hna tiah a ti. Cun, 'Islamic State' timi biafang zong hi a suallam a ngeilomi a si caah hmanti lo ding ah mitampi sin ah chimnak zong ka ngei.

"Zangfahnakte in 'Islam Ram-Islamic State' tiah au ti hna hlah u. Zeiraung ah tiah cun Ram (State) zong an silo i Biaknak (religion) zong an sifawn lo tiah mitlawm u caah riantuanmi phu United Voice of America president a simi Muslimpa Ahmed Bedier nih a chim.

Atu bantuk sualnak mithah, lainawn, a bu in nu tlaihrem le hngakchia thah le mivialte rawllo in a chiatu hna hi zeibantuk Pathian hmanh nih  a ngaithiam kho hna lai lo i an sualnak zong hmuh piak duhlo in a um bal fawn hna lai lo tiah US President Obama nih UN tonpumnak ah a chim.

Zuamcawhnak cakuat ah a biapimi catlang 24 a tel i Islamic zumhnak phung he a kalh ISIS pawl nih an tuahmi vialte pakhat-hnu-pakhat chirhchan in an tial.
(Ch.; www.huffingtonpost.com)

ISIS cu mi zeibantuk dah an si?

Islamic State (IS) timi cu Syria le Iraq ah hriamnam aa tlaihmi, Sunni-muslim (Kalifat) timi ram dirh aa timmi an si. IS nih Islam biaknak hi faktuk luarpar in aa tlaih. A hramthawk ah cun Islamic State of Iraq and the Levant (ISIL) an rak i ti. USA nih Iraq a tuk i a uk liote in mah i phu cu an rak dirh cang, Abu Bakr al-Baghdadi timi pa nih a hruai hna. Amah le mah zong leicung muslim hruaitu "Kalif" aa ti. IS cu hlandeuh ah terrorist-phu Al Qaida tangah a rak ummi a si, nain IS nih an hmanmi lainawn, mi hrem le an mi thahning an duh lo i an i al hna.

IS hi aziah mahtluk hin a tthawn?

Miphun asiloah ram pakhat cu biaknak kong in a buai sual a si ahcun a dam kho lomi cancer ah aa chuah i a kum za in a nguh. India le Pakistan cu Hindu le Muslim in an rak i ral. Israel le Palestine anmah tein ram aa cuh komi kha Khrihfa nih Khrihfa a si veve lomi Israel le Palestine ahhin zumhnak aa thawknak tiah pommi Israel kan ttanh. Laimi chung ah Khrih min in rian kan ttuannak paoh a tthawng ve. Cu bantuk cu a si ko, IS cu biaknak min a pu i biaknak he a pehtlaimi a si caah a tthawnnak a si.IS hi US nih Iraq a rak tuk lio tein a chuak cangmi an si pinah Arab-spring nih tamtuk a rak tthawnter. Algeria 1992 ah mipi nih uknak an rak la kho lo, Hamas 2005 ah an ti kho hoi lo i 2012/13 ah Egypt zong aa thleng hlei lo tikah IS nih an i hruhpimi cu democracy lam zul in Islam nih uknak kan la kho lai lo, timi hi a si. Mah ticun Al Qaida tang ah an tthangcho tthan i an i tthen hnu zong IS nih biaknak symbol tam tuk hi an propaganda ah hman, tahchunnak ah; Arab-spring kha hriamnam, nawlngeihnak (power) le zaang en in ttan lo cun kan rak tei lo caah a herhning paoh in nawlngeihnak hman ding, an ti.

Mah ti an van au tik ahcun Syria ram buainak an zoh i Assad cozah an tei ti lo tikah IS ruahnak a pommi an karh. Refugee le a dangdang ruang i Europe, America le Arab rampawl minung chung in IS ruahnak a pommi pawl kha Syria ral kan do lai tiin an rak kal i IS ah an lut hna. Mah ti cun IS cu mi tlawmte an rak si nain kum hnih-thum chung te ah a tlawmbik 18000-in-50000 kar an si lai ti a si. America le Europe rammi sinak a ngeimi tampi an kal cuahmah rih. An hriamnam zong hi Al Qaida sinin, USA ralkap (Iraq ral lio lakmi), Syria ral in lakmi an si hna. Syria i Assad cozah phurnak ding US nih Assad dotu hna a rak bawmh hna i cu Assad dotu hna cu atu IS hi an rak si. Mah ti cun hriamnam ttha an ngei kho.

(Ch.: teirialcatialtu.blogspot.com)