Kaladan Tlunkalnak Project Kong Ah India Dirhmun A Felfai Lo

Kaladan Project an tuah cuahmah lio: Photo_Kaladan Movement

Kawlram Bupi khualipi hlun Yangon hrambumh India pehtlainak zung (Embassy) bawi nih mipi nih duhlonak an langhter lengmang ko bu in duhsah ngai in an tuahmi cuahmahmi Chin le Rakhine Ramkulh le Northeast India pehtlainak tuahmi Tlanglam le Tilam kong ah lungtlin hngalhpinak kong a chim ṭhan.

Asinain, Kawlram Bupi cozah lei in 2012 ah tuah ding in hnatlaknak a um ko cang mi pawngkam thil rawhral hlathlainak (environmental impact assessments) kong ah zeihmanh a biakam ning in a tuah lo tiah a phuan.

Kaladan Multi-Model Transit Transport Project nih a timh bikmi cu Tilam lawng si lo in Tlanglam zong a si chih. A bik in, India ram ah Tlanglam in pehtlaihnak a har biknak ramkulh (Northeast State) 7 caah a si. Bengal rilipi in Chin le Rakhine Ramkulh hna ah tilam in a lut lai i cun Mizoram lei ah Tlanglam in luhter dingmi lam hnih komh project nganpi pakhat  a si.

Kan i ruahchannak bik le timh bikmi cu India le Kawlram kar ah a dangte in a ummi hna Chin le Rakhine ramkulh le Northeast India pehtlaihnak a ṭhatnak ding caah a si tiah India Embassy Yangon ah airawltu bawi Sailas Thangal nih a chim.

Hi rian (project) thoknak ding ah kap hnih a cozah nih mipi sin ah lunglaknak le fianternak an tuah lo. Mizapi caah rianṭuanmi phu (civil society organizations) komh nih Kaladan Cawlcanghnak (Kaladan Movement) phu tiah an i fonh i Kaladan Project kong ah fakpi in kap hnih cozah  India le Kawlram sin ah rian an thok kum 2008 in biahalnak an rak tuah cang.

Kaladan Movement nih mizapi lungduhnak lak in a cozah sin ah lungthin langhternak cathanh le report zong an chuah cang nain kap hnih cozah sin in zei bantuk bialehnak hmanh a um rih lo i Tlunkalnak Zung (Ministry of Transport) zong in zeihmanh lehnak a um lo tiah Chin Human Rights Organization (CHRO), country program officer Salai Lian Bawi Thang (Bawipi) nih a chim.

Project Hmanthlak;

India le Myanmar; Tilawng Hmang In Tlunkalnak Ding 

Hi rianṭuannak ah kan hmuh khawhmi cu Sittwe Tilawng dihnak kha ngan taktak in an kauh i ṭhanchoter chap kha hmuh khawh a si. Tilawng dihnak nih a tlawm bik Ton 20,000 leng a phormi Tilawng aa din kho lai. Tuan ah cun Tilawng Ton 2000-3000 kar a phor mi lawng a din kho nain atu ah cun ngan taktak in an kauh i ṭhanchoter. Kaladan rianṭuannak chung ah Paletwa in Mizoram ramkulh tiang pehtlaihnak ah a tlawm bik khan 80 tluk vawlei cung level a simi tlunkalnak lam nganpi zong an chuh lai. Hi vialte sersiamnak le saknak caah a tlawm bik US phaisa in Nuai $120 (US$120 Million) tluk a dih lai tiah theih a si i cu a dihmi cu India cozah nih a liam dih lai.

India le Kawlram Bupi cozah nih Lam sernak le cawhnak ding caah hnatlaknak cu April 2008 ah an rak ngeih. Asinain, Chin Nuhrin Covo Bu (Chin Human Rights Organization) cathanh nih cun kap hnih a cozah nih Mizapi sin ah zeibantuk lunglaknak le theihternak a um lo pin ah fimchimhnak zong a um lo caah mipi nih hi rian ruang ah fak ngai in harnak an tuar lai tiah a ti.

Salai Bawipi nih cun “Chin Ramkulh, Paletwa peng ah khuasami mizapi hnatlaknak an lak lo bantukin zeihmanh an i fiang lo ti cu a fiang in hngalh khawh  a si i zei bantuk Lam nganpi dah an tuah ti zong an i hngal lo” tiah a chim.

“A biapi in, kap hnih a cozah nih atu bantuk ram hnih pehtlainak caah lam nganpi tuahnak ruang ah zeibantuk pawngkam thil rawhralnak dah a um kho i, zeibantuk harnak dah a chuahpi khawh timi ṭhate in an zoh hmasa ding a si. Cun, Kaladan Tiva a rawh lai caah a pawng kam ah um in khua a sami nih zeibantuk harnak dah an ton khawh timi zong hi ruah piak a haumi a si” tiah a chim.

Kum 2012 ah Tlunkalnak Minister U Nyan Tun Aung le President ruahnak petu U Ko Ko Hliang nih mizapi sin ah harnak ton dingmi kong ah fakpi in kherhlainak kan tuah lai tiah biakamnak an rak ngei ko nain nihin ni tiang zeihmanh an tuahmi a um rih lo tiah CHRO program officer, Sam Cartmell nih a chim.

Asinain, Thangal nih cun “pawngkam thil rawhralnak raung ah cun harnak tam pi cu a um lai lo tiah a chim zeiruang ah tiah cun riantuantu pawl nih an sikhawh chung in a qha bik in an i zuam ko” tiah a ti. A fiangte in ka chim ko a si ahcun, pawngkam thil rawhralnak kong le harnak ton dingmi kong (environmental impact assessment) ah cun zeihmanh kherhlainak tuah a um bak lo. Atu ah, pawngkam humhimnak kong ah rawhralnak poipang cu a um lai lo ka ti bak lo nain a tlawm cu a tlawm lai” tiah a biapeh chim chap.

“Atu hnu in, awngkam rawhralnak kong he pehtlai in kherhlainak kan tuah lai maw tuah lo ti cu ka hngal ve lo. Rian kan tlainak kong ah cun Kawlram le India cozah pin ah Rakhine ramkulh cozah hnatlaknak ruang ah a si tiah a chim. A hman ko, kanmah India a cozah lei in cun mizapi hna sin ah zeibantuk qhatnak dah a chuah pi lai timi zong zeihmanh fianternak kan tuah rih lo. Asinain, zeitindah thil qha bik a si lai timi cu kan i zuam cuahmah lio pi a si. Kan rak thok hlan ah mizapi sin ah cun fianternak le ruahnak laknak cu kan rak tuah hmasa ding a si tiah” Mr. Thangal nih a chim.+++

Note: Kaladan Multi-Model Transit Transport Project cu India le Kawlram Cozah hnatlaknak in Rakhine, Chin ramkulh le India northeast ramkulh hna pehtlaihnak caah ser cuahmahmi a si.

Ref: www.mmtime.org, CHRO cathanh le Kaladan Movement Report

Salai SH Lian

01072014