Aiawhtu Paul Scully MP (UK) sining ka lung ah a hun um ngai i, ka hun thai!
Atu lio, UK Parliament ah MP a siliomi Paul Scully a thil tuah ning hi a dang ngai. Atutan hi, Dawr nganpi simi (Testco, Oldfields Road ummi) chung ah suimilam 1 chung leng dir in biaruahnak, biahalnak tbk. ngeih a duhmi hna caah a dir ko. Biaruahnak hmun a ser! A dangdang a tuahmi zong ka hmuh tawn. Pumpak zong in kan va ton.
Cu lak ahcun, kan nih cu an um le umlo zong hngalh a si lo. "Ramkulh (Chinram) in Ramkomh (Naypyidaw) ah aiawh tuanmi pawl nih le an rak tlung kho lo. Ramkomh (Chinram chung) in Ramkulh (Khualipi Hakha ah) aiawhtu a simi nih le Lutlai le Vuanci an hun kan si tak tik ah, ton khawh zong an si lo. Amah kha cozah an si cang tik ah, aiawhtu ngeilo phun zong kan tla. (Ahlei khun in, Hakha khuasa koko zaangfak kan si). Herh lio ah, anmah nih vung ton cu chim lo. Kan in herh ko, kan in ton ko lai tiah ti hmanh ah ton khawh an si lo, a phun dang ngai ko.
Ka hun langhter duh khunmi a dang pakhat cu; Paul Scully MP hi, Chin miphun ralzaam (Malaysia le India) kong ah humhimnak pekmi ngol ding in UNHCR nih biakhiahnak a tuah lio ah, UK cozah sin ah, Ramleng Vuanci sin ah, Parliament chung ah biahalnak a kan tuah piaktu zong a si. Amanh lo taktak lio ah caan a kan pek, kan bia a kan ngaih piak i a kan ton lawng siloin, Biahalnak tuah kan duhmi zong kan tial dih hnu ah kan pek i, UK Cozah, Parliament, Ramleng pehtlaihnak zung ah a kan hal piak.
Hika ah biahalnak zoh khawh si: LINK Cun, amah hi a pa pale (parent) chung hi Kawlram in an si, an ti. Kawlram miphun sinak thi tlawmte a ngeimi si kan ti lai cu, nain MP a va tlingmi a si (an ram hruai ning that ruang zong si lai). Tutan ah, Leng ah a dir lio ah, anmah rampi kong, a aiawhmi hna kong lawng silo in, Sri Lanka le Kawlram in Rohingya kong zong ka hal u a ti chih rih (A ratnak a philhlo lawng silo in, midang caah zawnruahnak a ngeimi zong a lang).
Cucaah, atuhi kan parliament zong term hnihnak a si cangmi ahhin aiawh ningcang kong, hruai ningcang kong hi an kan cawnpiak deuh a hau ko cang rua. Democracy ram kan i ti ve i, Aiawhthlah (Representative) phung kan hman ko ahcun, hihi an i fian a hau cang. Kawlholh in fiang ngai in an hun hman i, Hluttaw tiah an ti. A fawinak Thlahmi khi a si ko i, Thlahmi cu thlahtu a um caah a si ko caah, an sining le an rian hi tha tein hngalh ahcun a tha.
Ralkahtu (opposition) ding ah bochanmi nih le zei bochan awk tha hlah, Thimfung thlak dih i, an sungh le cangka in khawika an um zong kan hngal ti ve hna lo. A taktak ngaingai ahcun, Ramdang ahcun teinak hmulomi MP zong heh tiah dirpi a si. Thimnak ah teinak a hmulotu MP a cuhmi hi zapi nih an duhlo caah a si lo timi hi an theih ding a si. Anmah a rak thimtu hna an um ve thiamthiam, cucu kaltak riangmang in, daidep tein an um. A si ding a si lo. Thimnak a cu cang maw ti lawng ah hun chuah in, Khualleng bang khuasak zong hi a si kho lo.
Cucaah, kan i remh cio ding, kan cawn cio ding rian a tam ko!
A thleng cuahmahmi kan ram sining ah....
Tawite in ka tial lai ka ti i, a hun sau pah thiamthiam!
Alian
2019 August 30
No comments:
Post a Comment