Hmuh, Ton le Ṭhen: Lungthin A Tangmi Bia

Vawlei cung hin ton le ṭhen ṭhan lengmang a si. Kan i ton ning a ruang, kan tonning cang bel cu a dang liangluang. Kan hnu kum atu tik hi, Canada ram Quebec ramkulh i khualipi Montreal ah keimah lawng in caan ka rak hmang.

Laimi an um rua lo! A silo ah, Laimi tlawmte lawng umnak a si kho men, a ummi ka hngal manh hna lo. Kachin cu an um an ti. Mah lawng um lio caan ah hin chungkhar le hawile hlam khun a si ṭheo, nan ti cio lai dah! Thla khat tluk dengmang a si. Hi lio caan ah chungkhar le hawikom ṭhing tluk tein a ka dawtu nupa ka va paoh hna. An nupa in ka hmuh le cangka hna in ka tlaihchan phun an si. An ka dawt i, tlaihchan ve, rian kong le a dangdang ah khua ma chel ahcun Skype in kan i chawn ṭheo tawn. An nu hi Philippines in a pemmi a si i, Bing tiah an auh. An pa hi cu, anmah Montreal mi a min ah Dominic a si.

Buh kha ei a si tuk lem lo tik ah, nikhat cu Asia lei rawl na ngai lai tiah, an inn ah tlun an ka kawh. Zaanlei sang tuan nawn in ka va phan. An rak tawlrel ning a turu ko. A mak ko! Zaan riah ah vuailak ka ei dih hnu ah, fim awk a that ko caah, a thaizing zing le zaanlei ei awk ka ken chap :)

An pa hi, University of Montreal (France holh hmangmi sianghleirun) ah Professor a si i, an nu hi Equitas ah riantuanmi a si. An ka chimmi pakhat te khua a ka ruahtermi a um.

"Zeiruang ah Candada ahhin, na um ko lo? timi biahalnak in an thawkmi a si".

Cucu ka lehnak hna in an ka timi cu ka lung ah tangmi cu a si. Ka lehmi hna cu kan ram ah tuah ding le tuan ding a tam tuk. Kan ram ah kir in kan ram ah tuan a hau. Kan si khawh tawkte in kan ram ah tuan ka duh ka ti. A kan lehmi cu hitin a si;

"Canada in hin nan ram caah tampi tuah khawh a si ko cuta. Na um beh ding a silo zong ah, sianginn peh zong a ngah ko cu...... A hleikhun in tulio ah, Canada cozah sin ah chimreltu an tlawm tuk. An um lo tluk a si. Cucaah hika na um ahcun, Ramleng zung (Global Affairs tbk..) he khan nan i tong lengmang lai. Bia na va chimh khawh lengmang hna lai. Kawlram he na tuahmi a dang dingmi tu cu, na tonmi an i dang lai si ko cuta, audience an i thlenmi lawng pei si ko cu a ka ti".

Hi lio caan hi, Canada cozah nih Ramkomh Kawlram kong ah phung thar a chuahmi a um. Phung thar 17 lawng silo in, Tangka in nuai 300 (million) zong ka bawmh lai tiah a ti dihka te a si.

"Khua cu a ka ruahter ngai. Asinain, ka kir!"

Salai SH Lian
2019 June 23