Delhi Ka Phan

Ka dairy zohlo tein ka cing ko rih! May 1, 2010 a si. Delhi ka phan! 

India Gate, Delhi (Online)

South India khuapi pakhat a simi Bangalore in North lei ah a ummi, India khualipi Delhi lei ah kal ding ka si ahhin, ka lungthin in ka rak zenh tak. Ka timhnak a sau tuk cangmi a si ko nain ka lungthin nih a zenh ngai. A zenhnak a ruang cu, ka paw hlai in rilfonghlei an ka lakpiak dih ka a si caah zong a si. Culeng ah Delhi ka phan bal lo. Kal ti hawi ka ngei lo. 

Ka kal hnawh dingmi le a caan a nai chin thluahmah. Kal lo awk tha lo ka si! Kal ding in biakhiahnak ka tuah khawhnak a ruang tampi lak ah pakhat a telmi cu, ka hawipa Bawiuk a u nu hawi simi Tuang San, Delhi lei a kaldingmi pakhat pehtlaihnak a kan tuah piak khawh ruang zong ah a si. Cun, ramdang ummi kanu te le nih thazaang a kan pek lawng siloin Delhi ah chungkhar naihniam pehtlaihnak an ka tuah piak caah a si fawn. 

Delhi ah ka theihmi pahnih thumte an um ko nain, zeitindah Delhi nuncan ning a si timi ka theihlo ruang ah pehtlaih daan ka thiam hna lo. Keimah ka timhmi le dang khat a si fawn. A hrimhrim ah, Delhi ah Laimi tampi an um timi ka rak thei lo. Ka theihlonak nih a rak ka tei tuk hringhran. Nain, kal caan a phanh tik ah cun, kal ding in biakhiahnak tuah bang ka thawh. 

Ka thawh nak a ruang pakhat cu Bangalore sianginn pakhat ah ka riantuannak a simi Principal nih kal a ka sianlo bu tein a leng ah umnak nawl a ka pek caan a si. A leng ka umnak a ruang zong cu; ka pawlhlai ka si ruang ah sianginn chung ah zeihmanh keimah tein ka tuah kho lo. Ka rian simi Computer chimh zong caan saupi ka dir khawh lo caah ka tuan kho dekmak lo. Culeng ah mi caah hnahnawk ka si pah, ka thilsuknak, ka takkholhnak, le a dangdang herhhai ah bawmh ka hau. Ka umnak sianginn nih, keimah ruang ah, phungphai anmah lila nih an buar phah a ruang cu nu nih pa thilsuk piak cu chim lo biaruah hmanh pe4 danlo in a ngah lonak ah, ka thilsuk piak ding le tithan piak ding ah Sianguk nih a ka onh. 

Nain, keimah nih ka timhnak kal ka duh caah, ka si khawhlo nak lawng tein ka chim i, a leng ah um chung ding in nawl a ka onh caan te a si. Cucu cantha lak in, Delhi lei kal beh ding ka timh cu a si. Ka sining nih khualtlawn ding a ka onh hrimhrim rih lo. An ka hlainak hma hmanh a dam in a car rih lo. An ka hlainak hma a hring rih! Cucu bu in khual lam hla tlawn ding cu ka lung nih a zenh ziar. Nain, pasal ka duhmi ka tuah khawhnak hnga ding ahcun tiah biaphatsatnak ka tuah cu a si. Cun, tlungkal hawi an ka hmuh piakmi zong cu a si fawn. Dang khat ah ka tuah dingmi a tlai ding ka si.

Kan kalnak ding tlanglawng ticket zong hi, "Confrimed" thutnak kan ngah taktakmi a si rih lo. Tlanglawng kal lai ah a fiang chom dingmi a si. Nain, kal kan i timh bantukin kan i thawh. Tlanglawng dinhnak taktakpi a simi Majestic ah kal lo in, lamtan in kan bawmh. Hmmm! Kan bawmhnak zawn cu a hman ko nain, luhnak coach no. a hman lo caah, a dang ah kan lut sual. Kan luh in, ka hawipa he dangdang in kan thutnak taktak cu kan kawl. Keimah nih Deilei 1;30 tluk ahkhin ka va hmuh. Nain, an kai rua lo tiah an kan ruah caah tlanglawng nawlngeitu TT pawl nih midang an rak pek cang hna. Khuadei deng tiang ka hawipa he kan i hmu lo. Lungdong lo in, keimah ka bag i beipah in, a ka kawl lengmang i deilei ah a ka hmuh. Nain, thutnak kan ngah ti lo caah khuadei hngah in, TT pawl chimh ding kan bawmh. 

Khuadei i, thutnak cu an kan sersiam piak nain, a dangdang ah kan si hui! Cuticun, kan kal lengmang i, a veh lawng in a hung ka veh lengmang. Delhi kan phanh ceo ah tha tein tlanglawng dinhnak in, C1 lei ah kan kal ti. Suimilam 1 fai, Tlanglawng dinhnak in kan kal hnu ah khin, .....

... pehthan ding... Ziah Delhi Ah Ka Kal?

Note; Ka cawlcanghnak tete ka hun tialmi a si. A rel huam nan um sual ah...